UMAR E SAANI HAZRAT UMAR BIN ABDUL AZEEZ -(ROMAN)

🎍﷽ 🎍

*✦UMARE SAANI ABDULLAH BIN AZIZ ✦*              

       ✯—————————————✯        

 *✺ Hazrat Umar bin Abdul Azeez Reh. ✺*

*★_ Hazrat Umar Raziyallahu Anhu Khwab dekh rahe they, Khwab se bedaar hue to Aa'nkhe malte hue uth khade hue, Aapse Khwab ke bare me puchha gaya to farmaya :- Meri Aulaad me se Ek Shakhs hoga, Uski peshani par Zakhm ka Nishan hoga, Wo Zameen Ko Adl v insaaf se bhar dega _,*

*★_ Us Khwab ke baad Aap Aksar farmaya karte they :- Meri Aulaad me se Wo Kon hai Jo Zakhmi Peshani Wala hoga_,*

*"_ Dar Asal Us Waqt Aapki Aulaad me se Kisi ki Peshani par bhi Zakhm Ka Nishan nahi tha, Lihaza us Khwab ki Tabeer Samajh me nahi aa rahi thi, Lekin Ye Khwab tha Hazrat Umar Raziyallahu Anhu ka, Kisi Aam Aadmi ka Khwab to tha nahi, Ye to ho nahi Sakta tha k Uski koi Tabeer na ho _,*

*★_ Doosri Taraf Aapne Hidayat farma di thi k Aapki Aulaad me se koi Khalifa nahi banega, Yani Aapne Apni Aulaad ko khilafat se Mehroom kar diya tha, Aapne jab ye Khwab Apne Ghar Walo ko Sunaya tha to Khushi to unhe bhi hui thi Lekin Tabeer Samajh me nahi aayi thi, Albatta Ab Sab Log Khwab ki Tabeer ka intezar kar rahe they, Aapke Farzand Hazrat Abdullah Raziyallahu Anhu to Aksar Apne Waalid Mohatram ka Qaul dohraya karte they, Kaash ! Mujhe maloom hota k Hazrat Umar ki Aulaad me se Wo Kon hai Jiske Chehre par Zakhm ka Nishan hoga, Wo meri Seerat ko Apnayega aur Zameen ko Adl v insaaf se bhar dega _,*

*★_ Hazrat Umar Raziyallahu Anhu Ek Raat Gasht kar rahe they, Aapne Kisi Aurat Ko kehte Suna - Beti Doodh me Paani Mila de, Subeh hone Wali hai_,*

*"_ Jawab me Ladki ki Awaaz Sunayi di - Maa'n Mai'n Doodh me Paani kaise milau'n, Ameerul Momineen ne to Doodh me Paani milane se mana kar rakha hai _,"*

*"_ is par Maa'n ki Awaaz Sunayi di- Ameerul Momineen konsa dekh rahe hai'n _,*

*"_ Beti ka Jawab Sunayi diya - Maa'n Ameerul Momineen nahi dekh rahe lekin Allah to dekh raha hai _,"*

*★_ Ladki ki Baate Sun kar Hazrat Umar Raziyallahu Anhu bahut Khush hue, Subeh hui to Aapne Apne Bete Hazrat Aasim ko bula kar Raat ka Waqi'a Sunaya aur Farmaya : Jao Puchho ! Wo Ladki kon hai, Hazrat Aasim gaye, maloom hua Us Ladki ka Talluq Bani Hilaal se hai, Unhone aa kar Walid Mohatram ko bataya, Tab Hazrat Umar Raziyallahu Anhu ne farmaya - Beta Jao ! Us Ladki se Nikaah kar lo... wo Yaqinan is Qabil hai k usse Ek Esa Shakhs paida ho jo Saare Arab ki Qayadat kare _,"*

*★_ Waalid Mohatram ka Hukm sun kar Hazrat Aasim ne us Ladki se Nikaah kar liya, Usse Ek Ladki Paida hui, Us Bachchi ka Nikaah Abdul Azeez bin Marwaan bin Hakam se hua, Unse Umar bin Abdul Azeez Rehmatullah paida hue, Aap Madina Tayyaba me paida hue,*

*★_ Bachpan me Aap Hazrat Abdullah bin Umar Raziyallahu Anhu ki khidmat me Aksar Haazir hote, Hazrat Abdullah bin Umar Raziyallahu Anhu unki Walida ke Chacha they, Unke Paas se Waapas Apni Maa'n ke Paas aate to unse kehte - Maa'n Mai'n Apne Mamu ( Yani Abdullah bin Umar Raziyallahu Anhu) jesa Banna Chahta hu'n _,*

*★_ Hazrat Umar bin Abdul Azeez Rehmatullah kuchh bade hue to Unke Waalid Abdul Azeez bin Marwaan Misr ke Governor bana diye gaye, Unke Bade Bhai Abdul Malik bin Marwaan us Waqt Ameerul Momineen they, Aapke Waalid to Misr chale gaye, baad me unhone Apni Bivi ko bhi Misr bula liya, Wo Bachche ko le kar Misr jane lagi to Hazrat Abdullah bin Umar Raziyallahu Anhu ne unse kaha - is Bachche ko mere paas chhod jao _,"*

*★_ Chuna'che Aapko Maamu ke Yaha'n chhod diya gaya, Walida Misr chali gayi, Abdul Azeez ne Bachche ke bare me puchha to unhone kaha- Bachche ko Maamu ne apne paas rakh liya hai, Ye Sun kar Abdul Azeez ne bhi khushi ka izhaar Kiya aur ye baat Unhone Apne Bhai Ameerul Momineen Abdul Malik bin Marwaan ko likh bheji, Abdul Malik ne unka Ek Hazaar Dinaar Mahana Wazifa muqarrar kar diya,*

*★_ Kuchh Arsa baad Aap Apne Waalid se milne Misr aaye, Apne Bhai Asbag bin Abdul Azeez ke Saath Ghode dekhne ke Liye Astbal me chale gaye aur Ek Ghode par Sawaar ho gaye, Ghoda Shokh tha, usne Apne Sawaar ko niche gira diya, Aapki peshani par Chot lagi aur khoon Tezi se behne laga, Aapke Bhai Asbag ne jo ye dekha to bajaye ghabrane aur Pareshan hone ke zor zor se ha'nsne lage,*

*★_ Abdul Azeez bin Marwaan ko maloom hua to daud kar aaye, dekha k unka Chhota beta Bhai ke buri tarah Zakhmi hone par Qahqaha laga raha hai, Unhone gusse me aa kar kaha - Tumhare Bhai ki Peshani par Zakhm aa gaya, Zakhm se khoon beh raha hai aur Tum Ha'ns rahe ho, is par Asbag ne kaha - Baba Jaan ! Ye baat nahi hai k na to Mai'n inke girne par pareshan hu'n, na chot lagne par, Asal baat ye hai k Hamare gharane me ye baat mash'hoor hai k Ek Peshani par Zakhm ke Nishan wala Adl v insaaf se Zameen ko bhar dega aur Aaj Tak hume ye maloom hi nahi ho saka tha k Wo kon hai, So Aaj maloom ho gaya, Wo yahi mere Bhai hai'n, To Aaj us Khwab ki Tamaam Alamate poori ho gayi hai'n, Allah ki Qasam ! Yahi Bani Umayya ke Zakhmi Peshani Wale hai'n _,*

*★_ Abdul Azeez bin Marwaan ye Sun kar khush hue aur bole - Jis Shakhs se ye Ummeede ho'n Uski Taleem v Tabiyat Madina Munawwara hi me honi chahiye,*

*★_ is Zakhm Ki Vajah se Abdul Malik Ke Bete Aapse Hasad karne lage, Lekin Abdul Malik Aapse Bahut Muhabbat karte they, Unhe Apne paas bithate, Aapke Sar par Muhabbat se haath fairte aur Unhe Ounchi jagah bithate, Koi aitraaz karta k Aakhir Aap is Bachche ko itni izzat kyu dete hai'n to kehte- Tumhe kya pata ! Is Bachche ka Kya Muqaam hai, Ye Khalifa ho'nge, Ky'unki ye Bani Marwaan ke Zakhmi Peshani Wale hai'n aur Sayyadna Farooqe Aazam Raziyallahu Anhu ke Khwab ki Tabeer hai'n, Jab Zameen Zulm v Sitam se bhar jayegi to ye use Adl v insaaf se bhar denge, Fir Mai'n Kyu'n na inhe Ounchi jagah bithau'n _,*

*★_ Madina us Waqt ilm ka Markaz tha, ilm ke is Markaz me Aapne ilm Haasil Kiya, Qur'an E Kareem hifz kiya, Unke Ustaad Saleh bin Kaisaan they, Khalifa Abdul Malik bin Marwaan ne Hazrat Umar ko Aapki Shagirdi me de diya, Saleh bin Kaisaan us Waqt ke Mash'hoor muhaddis they, Ye kaise Ustaad they is Waqi'e se andaza ho jata hai _,*

*★_ Ek Roz Hazrat Umar bin Abdul Azeez der se Masjid me aaye, Jama'at ho chuki thi, Saleh bin Kaisaan ne unse puchha- Der se Kyu'n aaye, Unhone Jawab diya - Baal Sanwarne me der ho gayi, Shagird ka jawab sun kar Saleh bin Kaisaan bahut Hairaan hue, unhone socha, inke Dil me Namaz se zyada Baalo ki Ahmiyat hai, Unhone foran ye baat Aapke Waalid Abdul Azeez ko likh bheji, Unhone Misr se Ek Aadmi ko Rawana kiya, Madina Munawwara me Dakhil hone ke baad Sabse Pehle usne Hazrat Umar Rehmatullah ke Baal Mundwa daale, fir kisi se koi baat nahi ki,*

*★_ Hazrat Umar bin Abdul Azeez Rehmatullah ke Ek aur Ustaad Abdullah bin Abdullah they, Hazrat Umar bin Abdul Azeez unse bahut Muhabbat karte they, Aksar unki Khidmat me Haazir rehte, isliye k Aap ilm ka Samandar they, in Ustaad ka Aapki Zindgi par bahut Asar raha, Ek martaba Apni Ahliya Fatima se kehne lage- Fatima ! Jab mujhe Gussa aata hai to Apne Saamne Apne Ustaad Abdullah ko khada paata hu'n aur mehsoos karta hu'n, Aap mujhe Gusse se mana farma rahe hai'n _,*

*★_ Madina Munawwara me Aapne Hadees aur Fiqh ki Taleem Haasil ki, Unhi Dino Aapke Waalid Abdul Azeez inteqal kar gaye to Khalifa Abdul Malik ne Aapko Apne Bachcho me Shamil kar liya aur Apni Beti Fatima se Aapka Nikaah kar diya, Fir Abdul Malik bin Marwaan inteqal kar gaye, Unki Jagah unka Beta Waleed bin Abdul Malik Khalifa ban gaya, Us Waqt Hazrat Umar bin Abdul Azeez ki Umr 25 Saal thi, Tab Waleed ne Aapko Madina Munawwara ka Haakim muqarrar kar diya,*

*★_ Aap Rabiul Awwal 87 Hijri me Madina Munawwara ke Haakim muqarrar hue aur is Shaan v Shokat se Madina Munawwara me Dakhil hue k Ounto ka Juloos Aapke Saath tha, Madina Munawwara ke Log Aapki Aamad par khush hue, Aap Apne Daada Marwaan ke ghar thehre, Ye Bahut Wasi aur Shaandar Ghar tha, Log Aapko Mubarak Baad Dene ke liye aane lage,*

*★_ Aapke Jism se Khushbue'n uth rahi thi, Aap Sone ka Chamcha moonh me le kar paida hue they, Naaz v Niamat me pale they, Khidmat Guzaar Aapke Aas paas rehte they, Daulat ki kami nahi thi, in Sab baato ne Aapke Mizaaj me Shaan v Shokat paida kar di thi, Aapne Baal badhaye hue they, Tehband Jooto per gira hua tha, ithla ithla kar chalte they, Garz Bachpan ki koi Ada Aapne ab tak Chhodi nahi thi,*

*★_ Aapne Khalifa Waleed se Ek Baat pehle keh di thi aur Wo ye thi- Mujhse Zaalim ke kaamo par Baaz Purs na ki jaye, Matlab ye tha k Mai'n Zaalim ko nahi chhodunga, Aapne Madina Munawwara ki Governari ki ibtida is Tarah ki k Choti ke Paanch Chhe (5-6) Aalimo ko mashware ke liye muqarrar kar liya, Aap unse Mashwara karte rehte they, Kabhi Kabhi Aap unke Mashwaro se ikhtilaaf bhi karte they, Us Waqt tak Aapko Ash'aar vagera Sunne ki Aadat bhi thi, Ash'aar Sunane Walo ko inaam bhi de diya karte they, Jawani me Aapki ye haalat thi Kapde bhi bahut Qeemti pehante they, Bade bade Baal rakhte they,*

*"_ Ek Roz Aap Masjid me gaye aur Namaz padhne Lage Buland Awaaz se Qur'an padhne Lage, Aapke Nazdeek hi Hazrat Saeed bin Masayyab bethe they, Unhone Buland Awaaz me Qiraat Suni to apne Gulam se bole- Are ! is Namazi ko Hamare paas se hata de, Ky'unki iski Qiraat se hume Takleef ho Rahi hai _,,*

*★_ Gulam ne ye Koshish ki Lekin Hazrat Umar Rehmatullah barabar Qiraat karte rahe, Saeed bin Masayyab ne Apne Gulam se dobara farmaya- Kya maine Tumse kaha nahi k is Namazi ko Hamare paas se hata de _,*

*"_ Gulam bechara Governor Sahab ko Pehchanta tha, Wo unhe Waha'n se hatne ke liye kehne se ghabra raha tha, Chuna'che usne Qadre Buland Awaaz me Kaha - Masjid Hamari Jaheer nahi hai_"*

*"_ Hazrat Umar ne ye Alfaaz sun liye, Wo Samajh gaye k kya Maamla hai, Chuna'che Waha'n se hat kar Door goshe me ja kar Namaz Ada karne lage,*

*★_ Aap Qur'an E Kareem ki Tilawat bahut ban Sanwar kar kiya karte they, Ek Roz Muslim bin Jundub se Qur'an suna, Ye Masjid ke Waa'iz aur Qaari they, Qur'an E Paak Behatreen Tarteel ke Saath padhte they, Aapko unki Qiraat bahut Achchhi lagi, Aapne us Moqe par farmaya - Agar Koi Qur'an Ko Taro Taza sunna Chahe to Muslim bin Jundub ki Qiraat sune,*

*★_ Us Zamane me Aapko Mazaaq karne ki bhi Aadat thi, Taaham Had se nahi badhte they, Madina Munawwara ke Log Aapko us Zamane me Ya Ameer Ya Ameer kehne lage they, Governer hone ki haisiyat se Ab unhe koi Umar nahi kehta tha,*

*★_ Ek Roz Aap Madina Munawwara Ke Bazaar se guzar rahe they aur Haalat ye thi k Aapka Kapda Zameen se lag raha tha aur Ghisat raha tha, Muhammad bin Ka'ab Qurtubi ne dekh liya, Unhone Awaaz de kar kaha - Ey Umar ! Rehmate Aalam ﷺ ne farmaya - Jo kapda Takhno se Aage badh Jaye wo Aag me hai,*

*★_ Hazrat Umar Rehmatullah ko ye Sun Kar gussa aa gaya, Unhone Hazrat Ka'ab Qurtubi ko Sakht Lehje me jawab diya, Hazrat Ka'ab to Unke Khair Khwah they, Unka Bhala chahte they, baad me Hazrat Umar Rehmatullah ko bhi Mehsoos ho gaya k Ka'ab Qurtubi ki Niyat Nek hai,*

*★_ Fir Ek Waqi'a Esa hua k Jisne Hazrat Umar Rehmatullah ko badal kar rakh diya, Ek Shakhs ne koi jurm kiya , Hazrat Umar ne use Qaid kar diya aur Jitni Saza uski banti thi usse zyada use Qaid me rakha, Hazrat Muzaham ne Aapse Mulaqaat ki, Hazrat Muzaham bahut bade buzurg they, Unhone Mulaqaat ke dauran unse Kaha- Aap us Shakhs ko Riha kar de'n, Uski Saza ki muddat poori ho chuki hai, Aap ye baat Sun kar Gusse me aa gaye aur bole : Mai'n use nahi Chhodunga Yaha'n Tak k kuchh aur Muddat guzar jaye,*

*★_ Hazrat Muzaham ne foran farmaya - Umar ! Mai'n Tumhe us Subeh se darata hu'n k jis Subeh Qayamat aayegi, Umar Mai'n to Tumhara Naam hi bhool gaya hu'n, Kyunki Log Tumhe kasrat se Ameer, Ameer kehte hai'n, Ameer ne ye kaha Ameer ne Wo kaha,*

*★_ Hazrat Muzaham ki ye baat Sun kar Unhe Zindgi me pehli baar jhatka laga, Khud farmate hai't- Mujhe Muzaham hi ne bedaar kiya, Jo'nhi unhone ye baat kahi, Mujhe esa maloom hua Goya mere Saamne se parda hata diya gaya ho _," ( ibne jozi )*

*★_ Khalifa Waleed ne Hazrat Umar ko Hukm bheja- Masjide Nabvi Ko Wasi karaya jaye aur Ummahatul Momineen ke Hujre Masjid me mila diye Jaye'n, isse pehle Waleed ke Waalid Abdul Malik ne Masjid Wasi karne ka irada kiya tha Lekin Madina Munawwara ke Log Cheekh pade they aur Rone lag gaye they, isliye Wo Apne is iraade se Ruk gaye they, Ab Waleed ne Mehsoos kiya k ye kaam Umar bin Abdul Azeez Rehmatullah ke Zariye liya ja Sakta hai,*

*★_ Aapne pehle Ulma Kiraam ko Jama kiya, Unke Saamne Khalifa ka Hukm rakha, Un Sabne yahi kaha k Masjid ko Wasi karna bahut Zaroori hai, Fir Sab Sab Ulma Masjide Nabvi me aaye Taaki Nishan dahi kar Sake'n k Masjid Kaha'n tak Wasi ki ja Sakti hai, is Tarah Hazrat Umar ne Ummahatul Momineen ke Hujre Masjid me Shamil kar diye, Masjid ke Charo Taraf Jo Zameen thi, Use bhi Khareed kar Masjid me Shamil kar diya_,*

*★_ Is Tarah Mahraab ko bhi Aage badhaya gaya, Masjid ko bahut Khoobsurat banwaya, Minaar Buland kar diya, Hazrat Umar Sabse Pehle Shakhs hai'n, Jinhone Mahraabo ke niche imaam Ke Khade hone ki jagah banwayi,*

*★_ Jab Azaan Dene ke liye Minaara banaya gaya to bahut se Musalman Mulko me bhi Azaan ke liye Minaare banaye jane lage,*

*★_ iske baad Hazrat Umar ko Waleed ka Ek aur Hukm mila, Wo Hukm ye tha- Gha'ntiya'n Asaan banayi Jaye'n, jagah jagah Ku'nwe khudwaye jaye, Haajiyo ke Raaste me Hotel aur Saraye'n Khurasan ke Raaste me Kasrat se banwayi Jaye'n, Taaki guzarne walo ko Mushkile na pesh aaye'n, Un Sarayo me Zarurat ki Cheeze rakhi Jaye'n, Madina Munawwara me Foran Fawaara banwaya jaye,*

*★_ Hazrat Umar ne in hidayaat ke mutabiq ye Tamaam cheeze banwayi, Hazrat Umar ke in Tamaam Kaamo se khush ho kar Waleed ne Aapko Madina Munawwara ke saath Makka Muazzama aur Taa'if ka bhi Haakim bana diya, 90 Hijri me Aapko Saare Sooba Hijaaz par Wali muqarrar kar diya gaya,*

*★_ 91 Hijri me Waleed Hajj Ke Liye aaya, iske liye Masjide Nabvi khaali karayi gayi, Albatta Saeed bin Masayyab Reh. Apni jagah se na uthe, unse kaha gaya k Khalifa Masjid me hone Wali Tabdili ko dekhne ke liye aa rahe hai'n, Aap Yaha'n se hat Jaye'n, Masjid se bahar nikal Jaye'n, Lekin Hazrat Masayyab ne uthne se inkaar kar diya, Aapne Pachaas Saal se kabhi Takbeere Tehreema nahi chhodi thi, Waleed ke Hukm par kaise uth jate,*

*★_ Doosri Taraf Saeed bin Masayyab ne Waleed ki Bait karne se bhi inkaar kar diya tha, isliye Waleed unse Sakht Naraaz tha, Ab doosri baat ye ho gayi k wo uske aane par Masjid se bahar nahi gaye,*

*★_Waleed Masjid me dakhi hua, Usne dekha Masjid bilkul khaali hai, Lekin Sirf Ek Shakhs Mojood hai, Chuna'che usne puchha - Ye Shakhs kon hai, Kya ye Saeed hai'n? Hazrat Umar bin Abdul Azeez ne jawab me kaha - Ji haa'n ! Ye Wohi hai'n, Agar inhe Aapke bare me maloom hota to ye Apni jagah se uth jate, Aapko Salam karte, Magar inki Nazar Kamzor hai_,*

*★_ Is par Waleed ne kaha - Hume inka haal Maloom hai, Hum inke paas Chale jate hai'n, Ab Waleed khud unke paas gaya aur bola - Shekh Aapka kya haal hai ? Hazrat Saeed bin Masayyab Apni jagah se Zara bhi na hile, Albatta unhone kaha- Alhamdulillah Mai'n Khairiyat se hu'n, Ameerul Momineen ka kya haal hai ?_,"*

*"_ Hazrat Umar bin Abdul Azeez Rehmatullah unke Kirdaar ki Mazbooti se bahut mutassir hue,*

*★_ isi Tarah Madina Munawwara ke baqi log bhi Waleed se khush nahi they, Kyunki usne Ummahatul Momineen ke Hujro ko gira diya tha, Logo'n me uske Khilaaf gam v gussa tha, Fir Waleed ka inteqal ho gaya aur uske Bhai Suleman Khalifa Bane, Aapko Suleman bin Abdul Malik Waleed ki nisbat pasand they, Wo Naram Mizaaj they, idhar Suleman bhi Umar ko bahut pasand karte they,*

*★_ Fir Jab Suleman ki maut Qareeb aa gayi to unhone kaha- mere Bachche mere Saamne laye Jaye'n, Shayad Kisi Bachche me mujhe Mardangi ke Johar Nazar aa Jaye'n, Magar use Apne Bachcho me Khalifa banne ke qabil koi Nazar na aaya, Aakhir uski Nazar Hazrat Umar bin Abdul Azeez par padi, is Silsile me usne Raja bin Haiwah se mashwara kiya,*

*★_ Raja bin Haiwah Urdun ke Ulma me se they, Tamaam Shamiyo'n me Apne Zamane me bade ibaadat guzaar they, bahut Sanjida aur pur waqar insaan they, Hukmraan unhe unki Fazilat ki vajah se Azeez rakhte they, Unhe Apna Musheer muqarrar karte they, Apni Aulaad par unhe nigraa'n muqarrar kar dete they, Unhone Abdul Malik ke Zamane se le kar Suleman tak Hukmrano ki Sakhtiya'n dekhi thi, Ye un par Tanqeed bhi karte they, Suleman ke Zamane me to Raja uske Khaas Aadmiyo'n me Shamil they, Suleman ke Nazdeek unhe Wo Muqaam Haasil tha jo kisi ko nahi tha, Suleman kasrat se unse Mashwara karta tha, Ab khilafat ke Silsile me Suleman ne unhe bulaya to Unhone Mashwara diya, Mere Nazdeek Umar bin Abdul Azeez Hukumat ke zyada laayaq hai'n _,*

*★_ is par Suleman ne kaha- Lekin Mai'n Aulaad Abdul Malik ka kya karu'n, Agar Umar ko Khalifa banata hu'n aur unme se kisi ko nahi banata to Fitna uth khada hoga aur Wo use nahi Chhodenge Jo Un par Haakim hoga, Haa'n Ek Tadbeer ye k Mai'n Umar bin Abdul Azeez ke baad kisi ko Naamzad kar jau'n.. to sun lo mere baad Umar Khalifa ho'nge aur unke baad Yazeed bin Abdul Malik Khalifa ho'nge,*

*★_ is par Raja bin Haiwah ne kaha - Aap ye Wasiyat likh de'n aur us par Muhar laga de'n, Mai'n Logo'n se iske liye bayt le lunga, Jiska Naam us Band khat me hoga, isse Allah Ta'ala Raazi ho'nge aur Aap bhi,*

*★_ Suleman ne Raja ka ye Mashwara bhi Maan liya, Usne Wasiyat likhi aur us par Muhar lagwayi, Fir use Lapet kar Apne Ghar Walo ko bulaya aur unse bola- is Muhar Shuda aur Lipte hue parche me Jis Shakhs ko Khalifa ke liye Naamzad kiya gaya hai, Uske liye Bayt le li jaye,*

*★_ Haazireen ne usi Waqt Bayt kar li, Suleman ne wo Wasiyat Naama Raja ko de diya, Jab Log chale gaye to Hazrat Umar bin Abdul Azeez Rehmatullah Raja ke paas aaye aur bole- mere Dil me Suleman ka Ahatram hai, Mujhe unse Muhabbat hai, Wo bhi mujh par Meharban hai'n, Unke Mujh par Ahsanaat bhi hai'n, Mai'n Darta hu'n unhone Khilafat ke Silsile me mere bare me koi Wasiyat na kar di ho, Mai'n Tumhe Allah ka Waasta de kar kehta hu'n k mujhe bata do, usme kiska naam hai, Agar Tum is Waqt mujhe bata doge to Mai'n is Qaabil to hunga k inkaar kar du'n, baad me Mai'n inkaar karne ke Qaabil nahi reh jaunga,*

*★_ is par Raja ne kaha- Mai'n Aapko Wasiyat Naame ke bare me Ek Lafz bhi nahi bataunga, Ye Sun kar Wo Naraaz hue aur chale gaye, Thodi der baad fir aaye aur bole- Raja ! Allah ke liye Ameerul Momineen ko mere bare me bata do k Mai'n Khilafat ke Qaabil nahi,*

*"_ Raja ne ye sun kar kaha- Aap Wasiyat ke bare me jaanna chahte hai'n lekin Mai'n Aapko kuchh nahi bata sakta,*

*★_ Ek Din Suleman ne Raja se kaha - Raja ! Tum Zara Umar bin Abdul Azeez ka imtihaan lo ye jaanne ki koshish karo k unka Zaahir aur Baatin kaisa hai, Ba Zaahir to ye Bahut Nek hai'n, Achchhe Musheer hai'n Lekin Unka Baatin kaisa hai Zarurat to ye jaanne ki hai,*

*★_ Raja unka imtihaan lene ke liye unke Ghar mehmaan thehre, Wo Waha'n reh kar unka Ba Gaur Jaayza lete rahe, Aakhir Waapas aa kar unhone Khalifa Suleman ko bataya - Umar ka Qaul v Fail Ek hai Jo Kehte hai'n wo karte bhi hai'n,*

*"_ is Tarah Raja aur Suleman Logo'n Ke liye khair ka Sabab bane k unhone Hazrat Umar bin Abdul Azeez Rehmatullah ko Khalifa bana diya,*

*★_ Ek Roz Suleman Tafreeh ke liye Achchhe Kapde pehan kar ghar se nikla, Raaste me Ek Teele par Ek Qabr Nazar aayi, Ghar Waapas aaya to usi Raat Bimaar ho gaya, Fir Bimaari Zor pakadti chali gayi, is tarah Doosre ya Teesre jume ko wo Faut ho gaya, Us Waqt Suleman ke paas Sirf Raja Mojood they, Unhone us par Sabz Chaadar daal di aur Logo'n ke darmiyan Pahu'nche, Elaan karwaya k Sab Log jama ho Jaye'n, Khalifa ki Wasiyat Sunana chahta hu'n,*

*★_ is Tarah Jab sab log jama ho gaye to Raja ne Wo Kaagaz nikaal kar lehraya aur bole- ye hai Wo Wasiyat jisme Naye Khalifa ka naam Mojood hai, Tum Sab log us Shakhs ke liye Bait karo jiska Naam is khat me darj hai aur ikhtilaaf na karo, Varna doosre is ikhtilaaf se fayda uthayenge, Chuna'che Ek Ek Shakhs ne Bait ki, Jab Raja ne dekha k Sab Log Bait kar chuke hai'n to bole - Allah tum Sabko Ajr ata farmaye, Ameerul Momineen faut ho gaye hai'n _,"*

*★_ iske baad Raja ne us Wasiyat Naame ki Muhar ko tod diya Taaki Logo'n ko padh kar sunaye'n, Us Waqt Logo'n Ke Dil Zor Zor Se Dhadak rahe they k na Jane Khalifa Suleman ne Kise Khalifa banaya hai, Fir Raja ne Wasiyat padh kar sunayi, Umar bin Abdul Azeez Rehmatullah ka Naam Khalifa ke Tor par Sun kar Hisham bin Abdul Malik par Bijli giri, Usne Chilla kar kaha - Nahi Nahi ! Allah Ki Qasam ye nahi ho sakta _,*

*★_ Uske Ye Kehne par Ek Shaami ne Talwar So'nt li aur bola- Khalifa Suleman ne jis baat ka hukm diya hai tum Uske maanne se inkaar karte ho, is par Hisham ne kaha- Agar Khalifa Abdul Malik ke Khandaan ka hoga to hum maanenge aur ita'at karenge,*

*"_ is par Raja bol pade - Agar Tum inkaar karoge to Tumhari Gardan uda denge,*

*"_Saath hi Logo'n ne Hisham ko pakad kar ghasita Tab usne kaha - Humne Suna aur ita'at ki _,*

*★_ iske baad Raja ne Wasiyat Naame ka Agla hissa padha:- aur Umar bin Abdul Azeez ke baad Yazeed bin Abdul Malik Khalifa ho'nge _,*

*"_ Ab Sab Logo'n ne aur Hisham ne bhi yahi kaha- Humne Suna aur ita'at ki _,*

*★_ Hazrat Umar bin Abdul Azeez Rehmatullah us Waqt Sab Logo'n ke pichhe bethe they, aur Khalifa banne par inna lillah padh rahe they aur keh rahe they - Allah jaanta hai, Maine Zaahir aur Baatin me kabhi bhi Khilafat ki Khwahish nahi ki _,*

*★_ Ese me Raja Aapki taraf badhe, Taaki Khilafat Aapko Soa'np de'n, Nazdeek Pahu'nch kar unhone kaha- Ey Umar! Mimbar par aa Jaye'n aur Logo'n se kuchh farmaye'n_,"*

*"_ Hazrat Umar ne farmaya - Mujhe isse Alag hi rakhiye_," Raja ne foran kaha- Allah ke liye Esi baat moonh se na nikaliye, Varna Logo'n me Fitna khada ho jayega aur Foot pad jayegi _,*

*★_ Fir Raja Aapko Baazu se pakad kar Mimbar tak le aaye, Aapme us Waqt itni Taaqat nahi reh gayi thi k Mimbar par chadh sakte, Raja ne Aapko Chadhne me madad di, Aakhir Aapne farmaya- Logo'n! Is Silsile me Musalmano se mashwara nahi liya gaya, Mujhe Khilafat ki koi khwahish nahi, Mai'n Apni Bait se Tum Logo'n ko Azaad karta hu'n, Tum khud Apne Liye Khalifa Chun lo_,"*

*★_ Log ghabra gaye, Unhe Hazrat Umar Rehmatullah ke Alfaaz Sun kar hairat hui thi, isse pehle k Musalmano me Foot pad jati, Ek Ansari uth khade hue aur bole - Allah ki Qasam Ey Umar ! Is Tarah to Halaat kharab ho jayenge, Aap Apna Haath aage badhaye'n, Taaki hum Bait kar le'n, fir Sab log Bait ke Liye umad pade,*

*★_ Jab Log Bait kar chuke to Aapne Logo'n se farmaya - Mai'n Tumhe Taqwa ka hukm deta hu'n, Ky'unki Taqwa Har cheez ka badal hai aur Taqwa ka Badal koi cheez nahi, isliye Apni Aakhirat ke liye Amal karo, Kyunki Jo Aakhirat ke liye Amal karta hai, Allah Ta'ala uske Duniya ke Tamaam kaam bana deta hai, Apne Baatin Sa'nwar lo, Allah Ta'ala Tumhara Zaahir bhi Sa'nwaar dega aur Kasrat se Maut ko yaad karo aur Maut aane se pehle uske liye Achchhi Tarah Tayyar raho, Dekho ! Ummate Muhammadiya ka Allah Ek hai, Rasool Ek hai aur Kitaab Ek hai, Agar inka ikhtilaaf hai to Rupiye Paise me hai, Mai'n kisi ko Baatil Tareeqe se Dene Wala nahi aur na kisi ka Haq rakhne wala hu'n _,"*

*★_ Fir Aapne Qadre Buland Awaaz me farmaya- Logo! Jo Allah ka ita'at guzaar hai, us par meri ita'at bhi Waajib hai aur Jo Allah ka Nafarmaan hai, Us par meri ita'at nahi, jab Tak Mai'n Allah ki ita'at Karu, Tum bhi meri ita'at karo aur Agar Mai'n Allah ki Nafarmaani Karu Tum meri ita'at na karna_,"*

*"_ ye keh kar Aap Mimbar se utar aaye, ye 10 Safar 99 Hijri ki Tareekh thi,*

*★_ Aap Mimbar se utar kar thodi der tak Mimbar ke paas hi Apna Sar ghutno me de kar bethe rahe aur Rote rahe, Log Khusar Pusar karne lage k Umar Khilafat milne par Khush ho kar ro rahe hai'n, Aakhir log uth khade hue aur Apni Apni Sawariyo par Sawaar ho kar Waapas hue magar Hazrat Umar paidal hi Ghar Pahu'nche,*

*★_ iske baad Suleman ko Dafan kiya gaya, Hazrat Umar Rehmatullah aur Suleman ke Teen Bete Qabr me utre, Jab Suleman ki Mayyat uthayi gayi to Esa Mehsoos hua jese Suleman haath hila rahe ho'n, Ye Dekh kar unka Ek Beta bol utha:- Allah ki Qasam ! Mere Waalid Zinda ho gaye _,"*

*"_ Is par Hazrat Umar Rehmatullah ne farmaya - Esi baat nahi _,"*

*★_ Suleman Ke Dafan ke baad Logo'n ne ye Afwah uda di k use Zinda Dafan kar diya gaya hai, is baat ka imkaan hai k Wo Sirf behosh ho'n aur Faut na hue ho'n... Logo'n ne ye bhi kaha k iqtidaar ki muhabbat me Suleman ko Dafan karne me Jaldi ki gayi, Log Bani Marwaan aur Bani Abdul Malik ke paas gaye, usse bhi unhone yahi kaha- Suleman ko Dafan karne me Jaldi ki gayi, Agar Umar bin Abdul Azeez Khilafat se khush na hote to Dafan me jaldi na karte_,"*

*★_ Abdul Rehman bin Hakam bin Aasim ko in baato ke bare me maloom hua to Unhone Hisham bin Abdul Malik ko Sakht khat likha k Tum Log kya Baate kar rahe ho, Bahar haal Hazrat Umar bin Abdul Azeez Khalifa ban gaye, Sab Logo'n ne Aapke Haath par Bait kar li, Lekin Aap Ese Hukmran nahi Banna Chahte they jo Manmani karte ho'n, Aap Khilafat ko Shoora ki buniyad par chalana chahte they _,"*

*★_ Charo Khulfa E Rashideen ne Khilafat ko Shura ki Buniyad par chalaya tha lekin Ye Shurayi Nizaam Khatm hua ja raha tha, Hazrat Umar bin Abdul Azeez ise fir se jaari karna chahte they, Khilafat Ke kaamo me kaafi Kharabiya'n paida ho chuki thi, Khilafat ki Asal Shakl jo Hazrat Abu Bakar Siddiq Raziyallahu Anhu aur Hazrat Umar Raziyallahu Anhu ke zamane me thi, Ab Maazi ki Baate ho gayi'n thi, in Sab Baato ke Bavjood Banu Umayya ke Khulfa me Bahut Khoobiya'n bhi thi, Unhone Beshumar ilaaqe Fateh kiye, Nayi Masajid banwayi gayi'n Naye Shehar Abaad karaye, Unme islahaat karaye, Ye Aalim Faazil log Hukmraan they,*

*★_ Bahar Haal Hazrat Umar bin Abdul Azeez Rehmatullah mukammal tor par Khulfa E Rashida wala Nizaam Raa'ij karna chahte they, Wo Nizaam Jisme Ek Budhiya bhi Waqt ke Khalifa ka Daaman pakad kar use Tok Sakti thi, Wo Nizaam Jisme Ri'aya ko Apni jaan aur maal ka poora poora itminaan tha, Uski Baat Suni Jati thi Lekin ye kaam Asaan nahi tha, intehayi Mushkil aur Khatrnaak Tareen tha, Magar Aapne Apna kaam Shuru kar diya,*

*★_ Hazrat Umar bin Abdul Azeez Rehmatullah ne Khalifa banne ke baad Sabse Pehle Logo'n ke Gasab Shuda maal aur Jaydaade unhe Waapas dilwayi, Baaz Governaro aur Maaldaro ne Gareebo'n ki Zameeno par Qabza kar rakha tha, Wo unse Waapas le kar un Gareebo ko di, kehne ko ye kaam Asaan nahi tha Bahut Mushkil kaam tha, Saare Khandaan, Maaldaar aur Hukumat ke bade bade Logo'n ko Apna Mukhalif bana liya tha, Lekin Aap Dat gaye, kisi ki parwah na ki aur Gareebo'n ko unke Haq dilwane ka kaam Shuru kar diya, is kaam ko Aapne pehle number par rakha,*

*★_ Khud Aapke Apne Paas Virasat me mili hui Ek badi Jageer thi, Uske bare me Aapka khayal tha k usko Apne paas rakhna jaa'iz nahi, Chuna'che Aapne use Waapas karne ka irada Zaahir kiya, Us Waqt Aapke Khair Khwaho aur Dosto'n ne - Agar Aap Apni Jageer Waapas kar denge to Apni Aulaad ke Liye kya intezam karenge_," is Sawal ke Jawab me Aapne Farmaya - Mai'n unhe Allah ke Supurd karta hu'n _,"*

*★_ iske baad Aapne Apne Khandaan ke Logo'n Ko jama Kiya aur unse farmaya- Bani Marwaan ! Tumhare paas betahasha Daulat hai balki mere khayal me Ummat ka Do Tihayi maal Tumhare Qabze me hai, Aapne Dar Asal unhe isharo me Samjhaya tha k is Maal ko Waapas kar do, Wo Aapke ishare ko Samajh gaye, Unhone Sakht Lehje me kaha - Jab Tak Hamare Sar Hamare Jismo se Alag na ho Jaye'n, Hum ye maal Waapas nahi karenge, Hum kyu Apni Aulaad ko muflis banaye'n,*

*★_ is par Umar bin Abdul Azeez Rehmatullah ne bhi Sakht Lehje me farmaya- Allah ki Qasam! Agar is maamle me Tum Logo'n ne inkaar kiya to Tumhe Zaleel aur Ruswa kar dunga, mere paas se chale Jao _,"*

*★_ iske baad Aapne Aam Musalmano ko Masjid me jama Kiya aur unse farmaya- Hamare Hukmraano ne hume Esi Jageere ata ki hai'n jo Ata karne ka unhe koi haq nahi Pahu'nchta tha, na hume lene ka haq tha, Ab Mai'n Un Sabko unke Haqeeqi aur Asal Haqdaaro ko Waapas karta hu'n aur ye kaam Apni zaat se Shuru karta hu'n _,"*

*★_ Ye farmane ke baad Aapne Shaahi Jaydaado ke Register mangwaye, Muzaham Aapke paas Register kholte gaye, padh padh kar Sunate gaye aur Aap unko Qai'nchi se kaatte gaye, Subeh ki Namaz ke baad Shuru hone wala ye kaam Zuhar ki Namaz tak jaari raha, Aapne Apni aur Apne Khandaan ki Ek Ek Jageer Waapas kar di, Yaha'n Tak k Aapne Apne paas Ek Nagina bhi na rehne diya, ( Tabqaat ibne Sa'ad)*

*★_ Aapki Apni Ahliya Fatima ko Unke Waalid Abdul Malik ne Bahut Qeemti Nagina diya tha, Uske bare me Aapne unse farmaya- is Nagine ko bhi Baitul maal me dakhil kar do ya Fir mujhe chhodne ke liye Tayyar ho jao_,"Aapki Ahliya Fatima Khalifa Abdul Malik bin Marwaan ki Beti thi, Bahut Wafa Sha'ar thi'n, Unhone Wo Hira foran Baitul maal me jama Kara diya,*

*★_ Aapne Pukhta irada kar liya tha k is Qism ki Tamaam Jaydaade aur jama Shuda Na -Jaa'iz maal Logo'n me Taqseem kar ke rahenge, Zameen ke Ese Tukde bhi Aam Logo'n ko de de'nge, Taaki Awaam ke Dilo me Haq ka Roab jam jaye, Jis Roab ko pehle Hukmraan barbaad kar gaye they, Aapne Pukhta irada kar liya k islami Tehzeeb ko fir se Zinda karunga, Wo Tehzeeb jo Logo'n ke Dilo se mitti ja rahi thi,*

*★_ Aapne Sabse Pehle Apne Kapde utaar kar faink diye aur Sirf Aath Dirham ki Chaadar Apne Ouper le li, Fir Hukm farmaya- mere Paas Jo Bartan hai'n Un Sabko, Sawariyo aur Kapdo ko aur Atar vagera ko farokht kar diya jaye_,"*

*★_ Chuna'che Ye Sab cheeze 23-24 Hazaar Asharfiyo me farokht hui'n, Ye Saara Rupiya Aapne Baitul maal me jama Kara diya, Goya islaah ka Amal Apne Ghar se Shuru kiya, iske baad Sarkari Sawariya ko laya gaya, Ghode Zeen kase hue Qataaro me Aapke Saamne khade kar diye gaye, Un par Sawaar Talwaare So'nte hue bethe they, Un Sabse Aage muhafiz daste ka Afsar tha, Aapne usse farmaya- Mujhe Tumhari koi zarurat nahi, maine Tum Sabko Subuk Dosh kar diya,*

*★_ Fir Aapne Qataaro me Apne Khachchar Ko Talash kiya, Us par bethne ke baad Aapne Tamaam Pehredaro ko Faarig kar diya, Unki Tadaad 600 thi, Goya Pichhle Hukmraano ne Apni Hifazat ke Liye ye Hifazati Dasta rakha hua tha, Jesa k Aaj ke Zamane me Hukmraan Apni Hifazat ke liye rakhte hai'n, Fir Aapne Apne Khaadim Mazaham se farmaya- in Qanato aur Doosre Aara'ishi Saazo Samaan Sabko Baitul maal me jama Kara do _,*

*★_ Ab Haalat ye ho gayi k khud Hazrat Umar bin Abdul Azeez Rehmatullah ke Ghar me Gurbat ne dere jama diye, Unki Ahliya Fatima bint Abdul Malik ne Darkhwast ki - Mera aur mere Bachcho ka Mahana Muqarrar kar diya jaye_, Aapne jawab me farmaya- Baitul maal me gunja'ish nahi _,"*

*"_ is par Fatima ne kaha- Khilafat se Pehle Aap Doosro se lete rahe hai'n _," Aapne jawab diya - Us Waqt wo maal mere liye Halaal tha, Uska Wabaal aur Gunaah un par tha Jinhone Na-Jaa'iz Tareeqe se Maal Haasil Kiya aur Kharch kiya lekin Khalifa banaye jane ke baad Mai'n Esa nahi kar sakta _,"*

*★_ Is Tarah Hazrat Umar Rehmatullah Apni Ahliya ko barabar Samjhate rahe aur Aakhir kaar wo bhi Parhezgaar ke Saa'nche me dhal gayi_,"*

*★_ Khalifa banne ke foran baad Aap Teen Din tak Gaayab rahe, Un Teen Dino me Aapne Apne Gulaam Mazaham ke Saath Dastawez jama karte rahe, Un Dastawezo me unki Apni Jaydaad vagera ke Kagzaat bhi they aur Ameero ki Jaydaado aur Atiyaaat ke Kagzaat bhi they, jab Tamaam Dastawez aur iqraar naame jama kar liye to Elaan Kara ke Sab Logo'n Ko jama Kiya, jab Log jama ho gaye to Aap Mimbar par Tashreef laye, Mazaham Aapke pichhe they, Aapne us Waqt bilkul Mamooli Kapde pehane hue they, unki Qeemat 12 Dirham thi,*

*★_ Ab Aapne Tamaam Logo'n se farmaya - Logo'n ne hume Atiyaat diye, Unko Qubool karna hamare liye Jaa'iz Nahi tha aur na unhe dena Jaa'iz tha, Mere Khayal me un Atiyaat me Humse Allah Ta'ala ke Siva koi Hisaab Lene Wala nahi, Maine ye kaam Apne aur Apne Ghar Walo ki Zaati Jaydaad se shuru kiya hai, Mazaham tum unhe padh kar Sunao _,"*

*★_ Mazaham ne Logo'n ko Wo Sab padh kar Sunaya, Yani Jaydaad vagera ki Jo Tafseelaat thi, Fir Aapne Qai'nchi se un Tamaam Kagzaat ko kaatna Shuru kiya, Kaatte chale gaye Yaha'n Tak k Zuhar ka Waqt ho gaya aur Aap yahi kaam karte rahe they, Kuchh Jaydaade bager Tehreer ki thi, Yani Ese hi Qabza kar li gayi'n thi, Unke bare me Aapne Elaan farmaya- Koi Shakhs Gasab Shuda Zameeno se fayda na uthaye _,*

*★_ Fir jin Zameeno aur Khaito ke bare me Logo'n ka mutalba tha k Dar Asal unke hai'n, Wo Haqdaaro ko dilwa diye, Khud Aapke Qabze me jitne Khait aur Gulaam aur Lo'ndiya'n thi, Sab Aapne Baitul maal me jama Kara diye,*

*★_ Aale Bilaal me se kisi ne Aap par Muqadma qaa'im kiya, Muqadme me kaha gaya- Humne Aapko Khait farokht kiya tha, Khaane Farokht nahi ki thi, Lihaza Hamari Khaane hume de de'n _,"*

*"_ Aale Bilaal ne Aapko Aan Hazrat ﷺ ki Ek Tehreer dikhayi, Hazrat Umar bin Abdul Azeez Rehmatullah ne Lapak kar un Tehreer ko Choom liya, Use Apni Aa'nkho se lagaya, Fir Apne Muntazim se farmaya- iski Aamdani aur Kharch ka Hisaab laga lo aur kharch nikaal kar Baqi Raqam inhe de do_,*

*★_ Aapke pass Ek Zameen Yamama me thi, Aapne Apni Wo Zameen bhi Baitul maal me jama kar di, Jis Zameen ke Aapke paas Kagzaat they, Uska Munafa Baitul maal ko de diya aur Aapne Elaan farmaya- Mai'n Kabhi bhi Baitul maal se Ek Paisa nahi lunga_,"*

*★_ Unke Zaati Akhrajaat ke liye Bilkul Thodi si Zameen thi, Uski Aamdani sirf Do So Dinaar ke Qareeb thi, is par Aapse kaha gaya - Aap bhi Hazrat Umar Farooq Raziyallahu Anhu ki Tarah Baitul maal se Wazifa le liya kare'n, Jawab me Aapne farmaya- Mere Paas Zameen ka ye Chhota sa Tukda hai, Ye mere liye kaafi hai, Farooqe Aazam Raziyallahu Anhu ke paas itna maal bhi nahi tha, isliye Unhone Baitul maal se Lena Qubool kiya tha,*

*★_ Iske baad Aapne Fidak ka masla Hal farmaya, Fidak ke bare me Aaj bhi Baate ki jati hai'n, Hazrat Abu Bakar Siddiq Raziyallahu Anhu ko bura kaha jata hai, Lihaza is Moqe par is Masle ko bhi Samajh liya jaye, Fidak Madina Tayyaba se Do Ya Teen Din ke Faasle par Ek Baag tha, Usme khajoor ke Darakht aur Pani ke Chashme they, Aap ﷺ ne Ladayi ke bager use Fateh kiya tha,*

*★_ Maale Ganimat aur Maale Fe me Farq hai, Jo Maal Jung ke baad Haasil ho Wo Maale Ganimat hai aur Jo Jung ke Bager Haasil ho Usko Maale Fe kehte hai'n, Aap ﷺ ka Maale Fe ke bare me farman ye tha k Maale Fe Aapki Supurdgi me rahega, Aap use Jaha'n chahe'n kharch kar Sakte hai'n _,"*

*★_ Lekin iska ye Matlab nahi tha k Ye Aapki Milkiyat ho gaya, iska Matlab ye tha k ye Maal to Allah ka hai, Rasulullah ﷺ uske Ameen hai'n, Yani Fidak Aapki Zaati Milkiyat nahi hai,*

*★_ Maale Fe ke bare me Allah Ta'ala ne Waaze Tor par farmaya hai:- So Wo Allah ke liye aur Rasool ke liye aur Qarabatdaro ke liye Yateemo ke liye aur Mohtajo ke liye hai _," (Surah Hashr- 6-7)*

*★_ Ab Chu'nki Fidak bhi Maale Fe tha, isliye isko Aapne Apni Supurdgi me le liya Lekin ye Aapki Zaati Milkiyat nahi tha, Ye Aap ﷺ ki Virasat Nahi thi Jo Azeez Rishtedaro me Taqseem hoti hai, Aap is Jaydaad ko Allah ke Hukm ke mutabiq Waha'n kharch kar Sakte they Jaha'n Allah Ta'ala Hukm farmate _,*

*★_ isi Tarah Aap ﷺ ke baad Jo Aap ﷺ ka Janasheen banta, Us par bhi Laazim tha k Wo Maale Fe ko Wahi'n kharch kare Jaha'n Allah Ke Rasool kharch karte they,*

*★_ Doosri Taraf Sawal ye tha k Agar Aap ﷺ ki koi Zaati Milkiyat ho bhi to kya usme Virasat Jaari ho Sakti hai, is bare me khud Aan Hazrat ﷺ ka irshad hai- Hum Ambiya ka koi Vaaris nahi hota, Hum jo kuchh chhod jate hai'n Wo Sadqa yani Aam Musalmano ka Haq hai _," (Bukhari -1/526)*

*★_ is Saari Bahas ka khulasa ye hai k Fidak Nabi Kareem ﷺ ki Milkiyat nahi tha Balki Aap ﷺ uske Mutawalli they_,*

*★_ Aan Hazrat ﷺ ki Wafaat ke baad Hazrat Fatima Raziyallahu Anha Hazrat Abu Bakar Siddiq Raziyallahu Anhu ki khidmat me Tashreef layi'n aur Farmaya- Fidak mujhe diya jaye _,"*

*★_ is par Hazrat Abu Bakar Siddiq Raziyallahu Anhu ne farmaya - Maine khud Rasulullah ﷺ se ye suna hai k Hum Giroh Ambiya na kisi ke maal ke Vaaris Hote Hai'n, na hamara koi Vaaris hota hai, Hum Jo kuchh chhod kar Jaye'n Wo Sadqa hota hai, Fir Aapne farmaya, Mai'n iski Aamdani usi Tarah kharch karunga Jis Tarah Rasulullah ﷺ kiya karte they aur Aale Rasool us Maal maal se usi Tarah Khayegi Jis Tarah Rasulullah ﷺ ke Zamane me khaati thi aur khuda ki Qasam Aap ﷺ ke Qarabatdaro ke Saath Sulook aur Ahsaan me Mujhe Apne Qarabatdaro ke Saath Sulook aur Ahsaan se kahi'n Zyada Mehboob hai'n _," ( Bukhari)*

*★_ Ye Nihayat Ma'qool jawab tha, Sayyada Fatima Raziyallahu Anha Khamosh Ho gayi'n, iske baad Aapne kabhi Miraas ka mutalba nahi kiya, Balki Apne Mutalbe par Afsos kiya karti thi'n k kyu unhone ye Mutalba kiya,*

*★_ Fe ke Zariye Haasil hone wale Tamaam maal ka intezam Hazrat Ali Raziyallahu Anhu ke haath me tha, Unme Baag Fidak bhi tha, Hazrat Ali Raziyallahu Anhu ke baad Ye intezam Hazrat Hasan, fir Hazrat Husain Raziyallahu Anhum aur Hasan bin Hasan aur Fir Zaid bin Hasan Reh. Ke haatho me raha _," ( Bukhari)*

*★_ Is Husne Sulook ki vajah se Sayyada Fatima Raziyallahu Anha bhi khush rahi'n aur unki Aulaad bhi Khush v Khuraam rahi'n,*

*★ _ Ek Martaba Kisi ne Sayyadna Muhammad Baaqar bin Ali bin Husain Reh. se puchha - kya Aap Samajhte hai'n k Abu Bakar aur Umar Raziyallahu Anhum ne Aapke Haq me kisi Qism ki koi Zyadti ki hai, Aapne jawab me farmaya- Bilkul nahi ! Qasam hai Us zaat ki Jisne us Bande se Qur'an ko Naazil kiya, Hamare Haq me un Dono ne Raa'i ke daane ke barabar bhi zulm nahi kiya _,"*

*"_ Puchhne wale ne fir puchha - Kya Mai'n unse Muhabbat karu'n, Unhe Dost Samjhu'n, Jawab me farmaya- Haa'n Tu un Dono ke Saath Duniya aur Aakhirat me Muhabbat rakh aur Agar koi Wabaal pesh aaye to meri Gardan par hoga _," (ibne Abi Al-hadeed- 4/113)*

*★_ Hazrat Ali Raziyallahu Anhu ke Daur me kuchh Logo'n ne unse Kaha- Aap Baag Fidak Aulaade Fatima ko de de'n, is par Hazrat Ali Raziyallahu Anhu ne farmaya - Mujhe Allah Ta'ala se Haya aati hai k Mai'n us Cheez ko lota du'n Jise dene se Abu Bakar ne inkaar kiya aur Umar ne unke Farman ko jaari rakha _,"*

*★_ Sayyadna Muhammad Baaqar ke Bhai Sayyadna Zaid bin Ali bin Hasan Reh. Farmaya karte they- Agar Abu Bakar ki jagah Mai'n Hota to Mai'n bhi Fidak ke maamle me Wohi kuchh karta jo Abu Bakar ne kiya tha _,"( Al Bidaya v An Nihaya -5/290)*

*★_ Mukhtasar Ye hai K Sayyadna Abu Bakar Siddiq aur Sayyadna Umar Farooq Raziyallahu Anhum vagera ne Baag Fidak ke bare me Ahle Bait se koi Zyadti ya Zulm nahi kiya tha Jiska Aaj ke daur me bhi charcha kiya jata hai, Balki Un dono Hazraat ne Rasulullah ﷺ ki Tarah uski Taqseem ka intezam Sayyadna Ali Raziyallahu Anhu ko Soa'np diya tha, Sayyadna Ali Raziyallahu Anhu un Dono ki Khilafat ke dauran Nihayat khush usloobi se ye khidmat Sar Anjaam dete rahe, Chuna'che khud farmate hai'n - Mujhe Rasulullah ﷺ ne is maal ka Apne Zamane me Mutawalli banaya tha aur Maine Jaha'n Jaha'n munasib tha Waha'n Waha'n Taqseem kiya, Fir Abu Bakar aur Umar Raziyallahu Anhum ki Khilafat ke daur me bhi iska Mutawalli raha, ( musnad imaam Ahmada)*

*★_ Ye thi Mukhtasar Tafseel us masle ki, Ab ye maal Hazrat Umar bin Abdul Azeez Rehmatullah ke Qabze me tha aur is par unki aur unke ghar walo ki guzar basar thi, Kyunki Aapse pehle Khulfa ne ise Apni Jageer bana liya tha aur isi Tarah ye Aapki Jageer bana lekin jab Aapne Apni aur Doosro ki Jaydaade Baitul maal me jama Kara di to is maal ke bare me bhi Aapne farmaya- is maal par mera koi haq nahi, iski Jo Soorat Aap ﷺ ke Zamane me thi, Mai'n ise usi Haalat par lotata hu'n _," ( Tabqaat ibne Sa'ad - 5/128)*

*★_ isi Tarah Aapne Tamaam Gasab Shuda Jaydaade Logo'n se Waapas li aur unke Haqdaaro ko dilwayi, Aapne ye islahaat Sirf Shaam hi me nahi ki Balki islami Saltanat ke Tamaam Governaro ko likha- Tumhare ilaaqo me Jin Jin Logo'n ne Doosro ke maal Gasab kar rakhe hai'n Unse Waapas le kar Asal Haqdaaro ko diye Jaye'n aur is bare me Qat'an koi Ri'ayat na ki jaye _,*

*★_ Aur Jab Esa Kiya gaya to Soobo me Mushkilaat pesh aayi to Aapne Darul Hukumat se Rupiya bhijwa kar Nizaam ko Durust farmaya, Ye Tamaam Maal Chu'nki Muddato se Qabza Shuda chale aa rahe they isliye Unki Waapsi ke Silsile me bahut Mushkile pesh aayi'n,*

*★_ Jo Log is Duniya se inteqal kar chuke they, Unke maal unki Aulaado ko diye gaye, Ye Silsila Hazrat Umar bin Abdul Azeez Rehmatullah ki Wafaat tak jaari raha_,"*

*★_ Aur ye kaam Asaan nahi tha mushkil tareen tha, Jin Bade Bade Logo'n se Jageere chheeni gayi thi Ab Wo Aam Log ban kar reh gaye they, Unki Shaan v Shokat aur Guroor Khaak me mil gaya tha, Lihaza Ese Logo'n me Hazrat Umar Rehmatullah ke Khilaaf Nafrat Mojood thi wo Sab Aapse Shadeed Naraaz they Lihaza Aapke Khilaaf Sazisho me lag gaye, Unhone Aapke bare me Tarah Tarah ki Afwahe'n failana Shuru kar di, Tarah Tarah ke aitrazaat Shuru kar diye, Lekin Aapne un Logo'n ki koi parwah na ki aur Apna kaam karte rahe,*

*★_ Sabse Pehli Saazish ye ki k unki Foofi Fatima ko unke khilaaf Wargalane ki koshishe Shuru ki, Fatima bint Marwaan Ek Buland Paya aur Khuddar khatoon thi'n, Jab in sab Sazishiyo ne unke kaan bhare to unhone Hazrat Hazrat Umar Rehmatullah ko ek Paigaam bheja k Mai'n Ek Aham Kaam ke Silsile me Tumse milna chahti hu'n, Ye paigaam bhej kar Fatima Ghode par Sawaar hui'n aur Hazrat Umar ke paas Pahu'nch gayi'n, Hazrat Umar unke istaqbal ke liye khud uthe aur unhe Ghode se utarne me madad di, Nihayat Ahatram ke Saath bithaya, Fatima bint Marwaan ne Apni Aamad ka Sabab bataya,*

*★_ Aapne jawab me arz kiya - Fufi Jaan ! Jab Aan Hazrat ﷺ is Duniya se Rukhsat hue to Logo'n ko Ek Abaad Ghaat par Chhod kar Rukhsat hue, Fir us Waqt ka Khalifa Ek Esa Shakhs bana Jisne usme koi kami pesh nahi ki, Fir Ek ke Baad digar Mukhtalif Hazraat ke Haatho me intezam aaya , Baad me aane Wale kuchh Logo'n ne usme kami beshi ki, Allah ki Qasam ! Agar Allah ne mujhe Zindgi ata farmayi to Mai'n is intezam ko Sabqa haalat par lau'nga,*

*★_ Is par Fufi Sahiba ne kaha - Aapke Azeez Rishtedar Aapka Shikwa karte hai'n aur kehte hai'n k Aapne unse Wo Cheeze chheen li jo Pehle Khulfa ne unhe di thi Ya unse nahi chheeni thi, Maine unhe Aapke khilaaf Sakht baate karte Suna hai aur mujhe is baat ka dar hai k Wo Aapke Liye koi Sakht Din na le aaye, Iske jawab me Hazrat Umar ne farmaya - Maine unka Haq nahi liya, Mujhe Duniya ke Har Sakht Din ka Dar ho aur Qayamat ke Din ka Dar na ho, Esa mumkin nahi, Mai'n To ye Dua karta hu'n k Allah Ta'ala mujhe Qayamat ke Din ki Sakhti se mehfooz farmaye,*

*★_ Aapki Baate Sun Kar Foofi Sahiba uthne lagi to Aapne unhe bitha liya aur Hukm diya k Aag ka Ek Angara aur Asharfi layi jaye, Fir Aapne Asharfi ko Angare par rakha, Wo Asharfi surkh ho kar pighal gayi, Us par jo likha hua tha wo Sab khatm ho gaya, Fir Aapne farmaya - Foofi Jaan ! Kya Aapko Apne Bhatije par is jesi Asharfi se Raham nahi aata _,"*

*★_ Ye Sun kar Foofi Sahiba Khamosh khadi ho gayi'n, Hazrat Umar Rehmatullah ki ye Baat unke Dil ki gehraiyo'n me utar gayi, Unke Chehre par khof taari ho gaya, Foofi ko Khamosh dekh kar Hazrat Umar bole- Foofi Sahiba Baat kare'n, Aap to Khamosh Ho gayi'n, is par Foofi Boli- Umar ! Mai'n Tumse Tabadul khayal karne aayi thi Lekin Tumhare guftgu ke Andaz ne mujhme baat karne ki himmat nahi chhodi _,"*

*★_ Ye keh kar Foofi chali gayi'n, Aapne Dar Asal unhe Ye bataya tha k Jahannam me ye Azaab bhugatna hoga, Ab Foofi un Logo'n ke paas aayi'n Jinhone unhe Wargalaya tha, Aa kar unse boli- Tum Logo'n ne khud hi Abdul Azeez ka Nikaah Aale Umar Farooq Raziyallahu Anhu me kiya, Ab Agar Umar Hazrat Umar Farooq wale Kaam kare'n to aitraaz kyu'n karte ho, Ab Sabr karo _,"*

*★_ Khalifa Suleman bin Abdul Malik ka Ek Ladka aaya, Uski Zameen Dastawez na hone ki vajah se Aapne Zabt kar li thi, Usne Ek Dastawez Apni Aasteen se nikaal kar Aapko di, Aapne usko dekha aur puchha - is Dastawez ki Zameen kiski hai, usme bataya k Faasiq aur Faajir ibne Hijaaj ki, Ye Sun kar Aapne farmaya - Tab To Musalman is Zameen ke Zyada Haqdaar hai'n _,"*

*★_ Ab Wo kuchh na keh Saka, Bas ye kaha - Achchha meri Dastawez mujhe Waapas kar de'n _,"*

*"_ Jawab me Aapne farmaya- Maine ye Dastawez Tumse nahi Maa'ngi thi Tumne khud mujhe di hai, Lihaza Ab Mai'n ye Tumhe Waapas nahi dunga, Taaki Tum kabhi bhi ye Galat mutalba na kar Sako, is Tarah Hazrat Umar bin Abdul Azeez Rehmatullah ne Suleman ke bete ko Waapas lota diya aur use kuchh bhi na diya, usne gidgida kar Darkhwast ki Lekin Aapne uska bhi koi Asar na liya,*

*★_Aapke Gulaam Mazaham ye Sab dekh rahe they, Unhe Suleman ke bete par Taras aa gaya, Chuna'che usne kaha- Ameerul Momineen ! Aap Suleman ke Bete ke Saath ye Sulook kar rahe hai'n, Aapko uske Rone par bhi Taras nahi aaya_,"*

*"_ Jawab me Aapne farmaya- Mai'n Suleman ke is Bete ke Liye is qadar Muhabbat ke Jazbaat rakhta hu'n Jis Qadar Apni Aulaad Ke Liye rakhta hu'n, Lekin kya karu'n, Maamla Deen Ka hai, Kal Allah ko Hisaab dena hai _,"*

*★_ Ek Shakhs Umar bin Nayata se Waleed bin Abdul Malik ko bahut Muhabbat thi, Usne use Ek Foji Daste ka Ameer Muqarrar kar rakha tha, Us Foji Daste par Usi ka Hukm chalta tha, Jab Hazrat Umar bin Abdul Azeez Rehmatullah Zulm v Jabar se Haasil ki hui Jaydaade Haqdaaro ko dilwa rahe they to ye Shakhs Bahut Gazab Naak hua, Usne Sakht Gusse me Ek Khat Aapko Likha, Uske Alfaaz Ye they:-*

*★_ Aapne Sabqa Khulfa ko Daagdaar bana diya hai, Unke Tareeqe ko chhod kar Ek Naya Tareeqa Akhtyar kar liya hai aur Unki Aulaad ke maathe par Kalank ka Teeka laga diya hai aur Aapne us Rishte ko kaat diya hai Jisko milane ka Allah ne Hukm diya hai, Ky'unki Aapne Quresh ke maal aur unki Jaydaade Baitul maal me jama Kara di hai'n, Aapka ye Amal Na Qaabile maafi hai _,"*

*★_ Is Khat Ke Jawab me Aapne use Likha- Tera Khat mila, Mai'n Tujhe isse behtar Jawab de Raha hu'n, Ey ibne Waleed ! Tera ibtidayi Haal Wo hai Jisse Tu Ba-khubi Waaqif hai, Ky'unki Teri Maa'n Nabata Qabile ki Ek Lo'ndi Thi, Wo Gana Bajana aur Raqs Karti thi, Hims ke Bazaaro me Wo Dukan Dar Dukan fira karti thi, Use Dayan ke musalmano ne khareed liya aur Bator Hadiya Tere Baap Ke Paas bhej diya, Us Lo'ndi se Tu Badtareen Bachcha paida hua, Fir Teri Parwarish Ek Zaalim aur Sarkash ke tor par hui, Tu mujhe is Vajah se Zaalim aur Jaabir kehta hai k Maine tujhe aur Tere Ghode ko Allah ke us Maal se Mehroom kar diya hai jo Dar Asal Tera nahi, Balki Gareebo Miskeeno aur Bewaao ka maal hai, Sun ! Sabse bada Zaalim wo hai Jisne Tujh Jese Nadaan Bachche Ko islami Fauj ke Ek Daste ka Haakim bana diya aur Tu us Par Apni Marzi se Hukm chalata tha, Lihaza Tujh par bhi Afsos aur Tere Baap par bhi Afsos, Qayamat Ke Din Kitne Log Tum Baap Bete se Jhagadne Wale ho'nge, Tu aur Tera Baap jhagdne walo se Chhutkara payenge,*

*★_ Aur Sun ! Wo Shakhs intehayi Zaalim hai, Allah ke Ahad ko todne Wala hai Jisne Hijaaj bin Yusuf Jese Zaalim ko Haakim banaya, Wo Haraam Khoon Rezi karta tha aur Haraam maal Haasil karta tha, Usne Qurah bin Shareek ko Misr jese Soobe ka Haakim bana diya aur Ye Shakhs bilkul Ga'nwaar tha, Hijaaj ne use Har Qism ke khel kood aur Sharaab v Kabaab ki chhoot de di_,"*

*★_ ibne Nabata ! Intezar kar Jab Mai'n Tere aur Tere Ghar Walo ke Liye Faarig ho jau'n aur unko Ek Roshan Raaste par Chhod du'n, Kyunki Tum Ek Taveel Zamane se Haq Ko Chhode hue ho, Sharaab v Kabaab aur Lahu v La'ib me mashgool ho, ibne Nabata An Qareeb Mai'n Apni Aa'nkho se dekh Lunga k Mai'n Tujhe Farokht kar ke Teri Qeemat Miskeeno aur Bewaao par Kharch kar dunga k Unka Haq Tu Aaj Tak Khaata raha hai, Maine irada kar liya hai, Mai'n An Qareeb Ek Esa Shakhs Teri Taraf bhejne wala hu'n Jo Teri Peshani ke Badtareen baal kaat dega_,"*

*★_ Anbasa bin Saeed bin Aas Banu Umayya ke bade bade Logo'n me se tha, Khulfa ke paas uska Kasrat se aana jana tha, Wo is Qadar Maaldaar tha k use Maal ki koi zarurat nahi thi Lekin Laalchi hone ki vajah se Khulfa se maa'ngta hi rehta tha, Uska pet fir bhi nahi bharta tha, Suleman ne marne se pehle use 20 Hazaar Dinaar Atiya ke tor par diye they, Wo is Tarah diye they k use Ek Tehreer Likh kar de di k wo ye Raqam Baitul maal se le le_,"*

*★_ Anbasa Ye Tehreer pa kar bahut khush hua, Abhi usne Ye Raqam Baitul maal se li nahi thi k Suleman ka inteqal ho gaya aur Baitul maal ko Tala laga diya gaya, Lihaza ye Tehreer Naye Khulfa ka Hukm hone ke liye Rok li gayi, Ab Khulfa Hazrat Umar bin Abdul Azeez ban gaye, Ek Roz Wo Aapke paas aaya, Usne Hazrat Umar se kaha - Ameerul Momineen ! Hamari Aapse Rishtedari hai aur Aapki Qaum Aapke Darwaze par Khadi hai, Ye Log isliye aaye hai'n k Aapse pehle Khulfa unhe Jo diya karte they, Aap bhi unhe de'n _,"*

*★_ Uski Baat Sun kar Hazrat Umar ne farmaya - Anbasa mere maal me Tumhare liye koi gunja'ish nahi, Baqi raha Baitul maal, So usme Tumhara aur Doosre Logo'n ka barabar ka Haq hai, Tum Agar mere Rishtedar ho to Mai'n Tumhe Doosro ka Haq nahi de sakta _,"*

*★_ Aapka Jawab Sun Kar Anbasa ne kaha - is Soorat me Aapki Qaum kisi aur jagah Jane ki ijazat maa'ngti hai, Aapne farmaya- Wo Jaha'n chahe Ja Sakte hai'n,*

*"_ Ab Anbasa ne baat Tabdeel ki aur bola :- Ameerul Momineen! Suleman bin Abdul Malik ne mujhe ek Atiya diya tha, Abhi maine wo Atiya Baitul maal se liya nahi tha k Unka inteqal ho gaya, Meharbani kar ke Aap mujhe ye Atiya de de'n, Mere Aapse jis Qadar gehre Talluqaat hai'n, Us Qadar to Suleman se bhi nahi they_,"*

*★_ Aapne usse puchha- Wo Atiya kitni Raqam ka hai ? Usme jawab diya - Bees Hazaar Dinaar ka ( Dinaar Sone ke Sikke ka naam hai ) itni badi Raqam ka Sun kar Hazrat Umar Rehmatullah ke moo'nh se cheekh nikal gayi, Aapne farmaya- Bees Hazaar Dinaar to Musalmano me Chaar Hazaar gharano ke kaam aa sakte hai'n, itni badi Raqam me Ek Shakhs ko de du'n, Allah ki Qasam ye nahi ho sakta _,"*

*"_ Ye Sun Anbasa ne kaha - Fir to Aap mujhe bhi ijazat de de'n k Mai'n Apni Qaum ke Saath kisi doosri jagah chala jau'n, Aapne farmaya- Maine Tumhe ijazat di_,"*

*★_ Anbasa kamre se nikalne laga to Aapne Awaaz di, Wo Waapas palta, is Khayal se k Shayad Aapne Apni Raay badal di hai, usne suna, Aap farma rahe they, Anbasa Maut ko kasrat se yaad kiya karo, Agar Tum par Tangi hai to maut ki yaad Tumhari Tangi door kar degi aur Agar Farakhi hai to isse Duniya beech Nazar aayegi _,"*

*★_ Anbasa ko mehsoos hua Jese Aap usse Mazaaq kar rahe hai'n, Wo bahar jane laga to Aapne use Fir Awaaz di aur farmaya - Anbasa mere khayal me to Tumhe kahi'n nahi jana chahiye, Yahi'n raho, Mai'n Suleman ki chhodi hui cheeze farokht karne laga hu'n, Tum unko khareed lo, is Tarah kuchh Tumhara kaam chal jayega,*

*"_ Aapke is irshad ke mutabiq Anbasa ne Wo Cheeze khareed li, fir unko iraaq ja kar farokht kiya To kaafi nafa hua_,*

*★_ in Halaat me Tamaam bade bade Log Ek Jagah jama hue, Unhone Aapas me Mashwara kiya aur Sabne Ek baat Tay kar li, Wo baat ye thi k Hazrat Umar bin Abdul Azeez Rehmatullah Apne Maathat maal me Apni Raay aur Apna faisla Naafiz kare'n, Lekin Aapse pehle Khulfa ne Jo kuchh Ameero Vagera ko diya hai, Usme Dakhal na de'n Ky'unki Jo ho chuka wo Galat tha ya Sahi, Ab use na chheda jaye, Agar ye kaam Galat tha Yani bager Haq ke un Logo'n ko maal diye gaye they to iska Gunaah Saabqa Khulfa par hoga, Hazrat Umar par nahi hoga,*

*★_ Ye baat jab Tay kar li gayi to Hisham bin Abdul Malik ke Zariye Hazrat Umar Rehmatullah tak pahunchayi, Aapne poori baat Sun kar farmaya- Mai'n Allah ki Kitaab ke mutabiq Amal Daramad karunga, Maal chahe mere Maathat ho ya Saabqa Khulfa ka diya hua ho,*

*★_ Is par Un Logo'n ne bahut Hangama kiya Lekin Aap Apni baat par Ade rahe, Aakhirkaar Logo'n ne jaan liya k Aapne jo faisla kar liya hai, Us par Amal kiye bager nahi rahenge To Hangamo se Baaz aa gaye,*

*★_ isi Tarah Ek Waqi'a Khalifa Waleed ke Bete ka hai, Uska Naam Rooh tha, Ye Bahut Zaalim tha, Logo'n ke Saath bahut zyadtiya'n karta tha, Log usse Khofzada rehte they, Uske Baap Waleed ne Hims me Kuchh Jageer uske Naam kar di thi aur uski Dastawez bhi likh di thi, Hims Wale is baat ki Shikayat le kar Hazrat Umar Rehmatullah ke paas aaye, Unki Baat Sun kar Aapne Rooh ko bula liya aur usse farmaya- Unki Jagahe'n chhod do _,"*

*★_ Jawab me Rooh ne kaha- Khalifa Waleed ki di hui Dastawez ki ru se ye Zameene meri hai'n, Aapne farmaya- Unki Jagahe'n unhe de do _,"*

*★_ Ye Log Bahar nikal aaye to Raaste me Rooh Hims ke Logo'n ko darane dhamkane laga, in Halaat ki khabar Aapko bhi ho gayi, Aapne Ka'ab bin Haamid ko bulaya, Ye Jallad tha, Aapne usse farmaya- Rooh bin Waleed ke paas jao, Agar Wo Ahle Hims ki Zameene Waapas kar de to theek Varna uska Sar kaat kar le aao_,*

*"_ Ka'ab bin Haamid Namgi Talwar le kar Rawana hue, Rooh ne jab Jallad ko nangi Talwar le aate dekha to Dar gaya aur usne Aajiz ho kar wo Tamaam Jagahe'n Ahle Hims ko de di_,"*

*★_ Aap par Umra ne jo Aitrazaat kiye they, Aapne un Sabke Jawabaat diye, Lekin Banu Umayya ke Jin Logo'n se Jaydaade aur maal chheen kar Asal Haqdaaro ko diye gaye, Wo kab Araam se bethne wale they, Ek Din wo Sab jama ho kar Aapke Darwaze par aa gaye, Unhone Aapke Farzand Abdul Malik se kaha- Ya To Hum Logo'n ko andar jane ki ijazat dilwao ya fir Apne Abba Jaan se kaho, Unse pehle Jo Khulfa they, Wo hume maal dete rehte they, Hamare Martabo ka Lihaaz rakhte they, Lekin Tumhare Abba ne hume har qism ke maal v Daulat se marhoom kar diya hai _,"*

*★_ Abdul Malik ne unka paigaam andar Pahu'nchaya, Aapne Abdul Malik se farmaya- Un Logo'n se ja kar keh do k Agar Mai'n Allah Ta'ala ki Nafarmaani karunga to Qayamat ke Azaab se mujhe khof aata hai, Mai'n Aap Logo'n ko Na-Jaa'iz Ri'ayate nahi de sakta _,"*

*★_ Ye Shikayat Sirf Umra hi ko Aapse nahi thi, Balki Aapke Qareebi Logo'n ko bhi thi, Aapne jab Apne Qareebi Logo'n ke guzara Allowance band kar diye to unhone unhone bhi is qism ki Shikayat ki, Jawab me Aapne farmaya- Baitul maal me Tum Logo'n ka Haq isse zyada nahi banta Jitna Mulk ki Aakhri Hudood me rehne wale kisi Shakhs ka banta hai _,"*

*★_ Aakhirkaar Hazrat Umar Rehmatullah ki in Tamaam Koshisho ka Natija ye nikla k Logo'n se chheeni gayi Tamaam Zameene un Logo'n ko Waapas mil gayi'n Jinse Wo Chheeni gayi thi, Jo Zameene Arab ke Dehatiyo se Chheeni gayi thi Wo bhi Lota di gayi'n, Yaha'n Tak hua k Khalifa Abdul Malik ne Ek Shakhs ibrahim bin Talha ke Ghar par Qabza kar liya tha, Abdul Malik Ke baad ye Ghar Suleman ke Qabze me raha, Yaha'n Tak k Hazrat Umar ne ibrahim ko Waapas dilwaya,*

*★_ Garz Jis jis Zameen par kisi ne Na-Jaa'iz Qabza kar rakha tha Wo sab Aapne Haqdaaro ko Waapas dilwaye aur is kaam me is qadar pukhtgi dikhayi k Aapke baad iski Misaal milna mushkil hai, Aapne is baat ki bhi Zara bhi parwah na ki k is Tarah Rishtedar unse moo'nh mod le'nge, Talluqaat Tod le'nge, Aapne na to kisi ki Dhamki ki Parwah ki na kisi ki Sifarish maani, Jo Karna tha Bas Wo kar guzre,*

*★_ Is Bahut Bade Kaam se Faarig ho kar Aapne Zaalim qism ke Governoro aur Afsaro ki Taraf Tavajjo di, Hijaaj bin Yusuf Banu Umayya ka Sabse Zaalim Hukmraan tha, Uske khandaan wale usi jese Zaalim aur Jaabir ban gaye they, Aapne Khalifa banne ke baad Hijaaj bin Yusuf ke poore Khandaan ko Yaman ki Taraf Jala Watan kar diya aur Waha'n Ke Governor ko likha k Mai'n Un Logo'n ko Tumhari taraf bhej raha hu'n, Jo Arab me Badtareen khandaan hai, Un Logo'n ko idhar udhar muntashir kar do Taaki ye Ek Jagah jama ho kar Saltanat ke khilaaf Saazishe na kar Sake'n,*

*★_ Aapne Us Afsar aur Hukmraan ko Ma'azool kar diya Jisne Musalmano ka Khoon bahaya tha, Agarche Wo Aapka Azeez hi kyu na tha, in islahaat ka Natija ye nikla k Awaam un Zaalim aur Jaabir Logo'n ke Zulmo se mehfooz ho gaye aur unhone itminaan ka Saa'ns liya, Apne is kaam ke bare me Aapne Hazrat Umar Raziyallahu Anhu ke Pote Hazrat Saalim Rehmatullah se bhi Mashwara kiya,*

*★_ Misr Ka Kharaaj Vasool Karne par Osama bin Zaid Tanukhi muqarrar tha, Ye Shakhs Nihayat Zaalim aur Jaabir tha, Allah Ta'ala Ki Muqarrar Karda Sazao'n se bhi Zyada Sazae'n insaano ko deta tha, Logo'n Ke Haath Katwa deta tha, Aapne iske bare me hukm farmaya- ise Har ilaaqe ki jail me Ek Saal rakha jaye aur iske Haath Paanv baandh kar rakhe Jaye'n, Sirf Namaz Ke Waqt me haath Paanv khole Jaye'n,*

*★_ Ye Ek Saal tak Misr me Qaid raha, Fir Filisteen ki jail me bhej diya gaya, Waha'n bhi ye Ek Saal tak jail me raha, isi Tarah Aapne Yazeed bin Abi Muslim ko Africa se Barkhasth kiya, Ye bahut Galat Qism ka Aadmi tha, Zaahir me ibaadat guzaar banta tha magar Zalimana hukm jaari karta rehta tha, Jab iske Saamne Logo'n ko Sazae'n di jati to ye us Waqt Tasbeeh aur Zikr me masroof rehta, Saath Saath Sazae'n bhi Sunata rehta, Aapne ise bhi Mazool kar diya,*

*★_ is Qism ke kaam Aapne Khalifa banne ke foran baad kiye aur ye Kaam Anjaam Dene me Zara bhi der na lagayi, Aap Suleman ke Kafan Dafan se Faarig hue aur Qabristan se Waapas aane lage to Aapke Liye Shaahi Sawariya layi gayi'n, Aapne puchha k ye kya hai ? Aapko bataya gaya k ye Shaahi Sawariya hai'n, in par kabhi koi Sawaar nahi hua, Naya Khalifa hi pehli baar in par Sawaar hota hai, Aapne Apne Khaadim Mazaham se farmaya- ye Tamaam Sawariya Baitul maal me jama kar do,*

*★_ Us Waqt ka Ek Dastoor ye tha k Jab koi naya Khalifa Khilafat Sambhalta to uske Liye Shamiyane lagaye jate they, Aapne unko bhi Baitul maal me jama karane ka hukm diya, uske baad Aap Apne Khachchar par Sawaar hue aur us Jagah Pahu'nche jo Aapke bethne ke liye banayi gayi thi, Us Jagah par na jane kya kuchh bichhaya gaya tha, Aapne un Sab Cheezo ko Apne Pairo se hata diya aur Chatayi par beth gaye aur Farmaya- in Sab Cheezo ko bhi Baitul maal me dakhil kar do_,"*

*★_ Us Daur Ka Ek Dastoor ye tha k Jab kisi Khalifa ka inteqal ho jata to uske Libaas, istemal Ki hui Doosri Cheeze, Uske Baal Bachcho ka Haq Samjhi jati thi, Jo Atar aur Libaas Vagera Abhi istemal nahi kiye hue they, Wo Naye Khalifa ko mil jate they, Suleman Ke Ghar Walo ki Saari Raat is kaam me Guzri k Tel aur Khushbuo'n ko Ek Sheeshi se Doosri me ulatte rahe aur Jo Kapde Suleman ne Ab Tak Nahi pehne they Unko Pehan Pehan kar Ese banate rahe Goya wo istemal Shuda hai'n _,"*

*★_ Subeh hui to Suleman Ke Ghar Walo ne Wo Tamaam Cheeze la kar Aapke Qadmo me dher kar di aur Fir unko ye kehte hue alag alag karne lage- Ye Aapki hai'n, Ye Hamari_," Aapne puchha - Ye aur Wo ka kya matlab hai ?*

*"_ unhone bataya - Jo Kapde aur Atar Pichhle Khalifa istemal kar chuke hai'n, Wo uski Aulaad ka Haq hai, Jinko Abhi tak istemal nahi kiya gaya Wo Naye Khalifa ka Haq hai _,"*

*"_ Aapne farmaya- Ye Saari Cheeze na meri hai'n na Tumhari, Mazaham in Sabko Baitul maal me jama kar do Ye Sab Musalmano ka maal hai _,"*

*★_ Ye Haal dekh kar Ameero aur Wazeero ne Aapas me kaha- Ye Sab Cheeze to haath se gayi, inme se to ab hume kuchh milega nahi, Ab Sirf Ek cheez reh gayi hai, Wo hai'n Lo'ndiya'n, Unhe bhi pesh kar ke dekhte hai'n, Shayad unme se kuchh mil jaye, Varna in Sahab se koi ummeed nahi rakhni chahiye,*

*★_ Chuna'che Haseen aur Jameel Lo'ndiya'n Aapke Saamne la khadi ki gayi'n, Aapne unme se Ek se puchha- Tum kon ho aur Tumhe Yaha'n kisne bheja hai ? Lo'ndi ne bataya - Dar Asal Mai'n Fala'n Shakhs ki Lo'ndi thi, Mujhe pakad kar Yaha'n le aaya gaya, Ab Mai'n Fala'n ki Lo'ndi hu'n, Aapne baqi Lo'ndiyo'n se bhi Sawalaat kiye, fir unke bare me farmaya- in Sabko inke Asal Maalik ke Hawale kar diya jaye, mujhe inki koi zarurat nahi hai _,"*

*"_ Un Lo'ndiyo'n ko Sawariya'n di gayi'n aur unhe unke Shehro ki Taraf bhej diya gaya,*

*★_ Ye Halaat dekh kar Ameer aur Wazeer samajh gaye k Hazrat Umar se insaaf ke alawa aur Kisi Qism ki ummeed nahi rakhi ja Sakti, Khilafat milne ke baad Teen Din tak Aapne Logo'n se mulaqaat nahi ki, Log intezar karte rahe k unke bare me kya Ahkamaat Saadir hote hai'n, Aakhir Teen Din baad Aapne Aam ijlaas bulaya, Aapne Elaan farmaya- Tamaam Kaam Shari'at ke mutabiq ho'nge, Kitaab v Sunnat ke mutabiq faisle ho'nge, Aadilana Nizaam chalega_,"*

*★_ Aapne Duniya ko Khair Baad keh diya aur zindgi ke Aakhri Lamhaat tak is Tariqe par Qayam rahe, Aapne Logo'n se farmaya - Logo'n Tum Sabko Ek Din Allah ke Saamne khade hona hai, Mai'n bhi khada ho'unga, Allah Ta'ala ne kuchh Fara'iz muqarrar kiye hai'n aur Kuchh Sunnate jaari ki Hai'n, Jo Shakhs in par Amal karega, Wo Rasulullah ﷺ se ja milega aur Jo inko chhod dega, Use Mita diya jayega, Jo Shakhs mere Saath rehna chahta hai, Use Paa'nch Cheezo ka khayal rakhna hoga :-*

*★_ (1) Jin Logo'n ki Zarurate mujh tak nahi Pahu'nch paati, Unki zarurate mujh tak pahunchaye,*

*(2) Adal aur insaaf ki jo Soorte'n mere ilm me nahi, unke bare me Rehnumayi kare,*

*(3) Haq v insaaf ke Qayaam ke Silsile me meri madad kare, Amanat ka haq ada kare,*

*(4) Mere Saamne kisi ki Burayi na Bayan kare,*

*(5) Meri aur Tamaam Logo'n ki Amanat ka Haq ada kare,*

*"_ Jo Shakhs in Paa'nch Baato par Amal nahi kar sakta use mere Saath rehne ka koi Haq nahi,*

*★_ Aapne Pehredaro se farmaya - Jab Mai'n Bahar Aane lagu'n to khade hone ki zarurat nahi, na mujhe Salam karne me Tum pahal karo, Mai'n Bahar aa kar Tumhe Assalamu Alaikum kahunga_,"*

*★_ Aapne Logo'n se farmaya - Rasulullah ﷺ aur Khulfa E Rashideen ki Bahut si Sunnate hai'n, Un par Amal karna, Allah ki kitaab ko mazboot pakadna, unse Allah ke Deen me Quwwat Haasil hai, Unme Tabdeeli ka kisi ko Haq nahi na Sunnat ke khilaaf koi kaam karna Achchha hai, Jo Shakhs in Sunnato se Hidayat Haasil kare, Wo Hidayat par hoga aur inse madad le uski madad hogi aur Jo Shakhs in Sunnato ko chhod de, Wo Raahe Hidayat se Hat jata hai, Fir Wo jidhar jayega Allah Ta'ala usi Taraf fair denge aur Use Jahannam me jho'nk de'nge aur Wo Lotne ki Bahut buri Jagah hai,*

*★_ Imaam Maalik Rehmatullah Aapke is irshad ke bare me farmate hai'n - Mujhe Hazrat Umar bin Abdul Azeez ki ye baat bahut Pasand hai, isse Sunnate Zinda hoti hai'n _,"*

*★_ Aapne Logo'n Ko khutba diya to usme farmaya - Logo'n! Tumhare Nabi ke baad koi Nabi nahi ( Khatme Nabuwat Zindabad) Jo Kitaab Aap ﷺ par utaari gayi, na is Kitaab ke baad koi kitaab hai, Ab jo Cheeze Allah Ta'ala ne Apne Nabi ki zuban se halaal thehra di'n Wo Qayamat tak Halaal hi rahengi aur Jin Cheezo ko Aapki Zuban se Haraam thehra diya, wo Mukammal Haraam hi rahengi, Khoob Samajh lo, Mai'n faisla karne wala nahi, Mai'n to Bas Allah aur uske Rasool ke Faislo ko Allah ki khaatir Naafiz karne wala hu'n, Mai'n Koi Naya Raasta nahi nikalunga, Balki Pehlo ke Raaste par chalunga,*

*★_ Sun lo ! Allah ki Nafarmaani ki soorat me kisi ki farmabardari Jaa'iz nahi, Mai'n Tumse behtar nahi hu'n Tum hi me se ek fard hu'n, Albatta meri zimmedariya'n tum sabse zyada hai'n, Logo'n ! Sabse Afzal ibadat Fara'iz ka Ada karna aur Haraam se bachna hai, Bas mujhe yahi kehna tha Mai'n Apne liye aur Tumhare Liye Allah ke Huzoor isatagfar karta hu'n _,"*

*★_ Khalifa bante hi Aapne Aish v ishrat par laat maar di, Tarah Tarah ke khane band kar diye, Jab Aapka khana Tayyar ho jata to kisi Bartan me rakh kar usko Dhaa'np diya jata, Jab Aap Tashreef laate to use khud hi utha kar Tanawul farma lete_,"*

*★_ Koofa Ki Ek Aurat Aapki Khidmat me Haazir hui, Usne aa kar kaha - Aapki Taraf Se Wazife Taqseem hote hai'n lekin mujhe unme se kuchh bhi nahi mila, na meri Betiyo'n ko kuchh Mila_", Aapne usse puchha-Tera Gawah kon hai ? Waha'n ke Log Gawahi de'nge, Aapne farmaya-Achchha Tum Shaam ko aana, Mai'n Tehreer lekh dunga, Fir bole - Shaam ka kya pata kon jiye kon mare, Lao abhi likh deta hu'n _,"*

*★_ Ese me Aapki Nazar Apne Bete par padi, Uska Kurta fata Nazar aaya, Galiban kisi cheez me Ulajh kar usi Waqt fata tha, Aapne usse farmaya- Beta ! Apne Kurte ka gireban durust kar lo Ky'unki Tumhe iski itni zarurat pehle kabhi nahi thi jitni Aaj hai _,"*

*★_ isi Haalat me Khalid bin Rayan Aapke Saamne Haazir hua, Ye kisi Bade Ohde par tha, Waleed ke Daur me usne Ek Shakhs ko Qatl kar diya tha Lekin Hukumat me hone ki vajah se use kisi ne koi Saza nahi di thi, Ab bhi ye Aapke Pass isliye aaya tha k Naye Khalifa se naye Ahkamaat Haasil kare, Aapne use dekh kar nafrat se moo'nh fair liya, use Hukm diya- Ye Talwaar Yaha'n rakh de_," usne Talwaar rakh di, Ab Aapne usse farmaya- Jao Mai'n Tumhe Mazool karta hu'n _,"*

*★_ Iske baad Aapne ye Alfaaz kahe- Ey Allah ! Maine Teri Raza ke liye Khalid bin Rayan ko gira diya hai, Ab use kabhi na uthana_," Allah Ta'ala ne Aapki ye Dua Qubool farmayi, Khalid bin Rayan jab Tak Zinda raha, kabhi kisi ki Zuban par uska Zikr tak na aaya, Yani kisi ne use moo'nh na lagaya,*

*★_ Aap Hazrat Umar Rehmatullah ne Pehredaro ki Taraf dekha, Unme Aapko Amru bin Muhajir Nazar aaye, Ye bahut Parhezgaar they, Aapne unse farmaya- Amru ! Maine Tumhe kasrat se Qur'an E Kareem ki Tilawat karte hue Paya hai aur ye bhi dekha hai k Tum Nawafil Esi Jagah padhte ho Jaha'n Tumhe koi na dekh sake aur Namaz bhi Tum khoob Sa'nwaar kar padhte ho, Ye Talwar utha lo, Mai'n Tumhe Pehredar muqarrar karta hu'n _,"*

*★_ Aapki Bivi Fatima, Khalifa Abdul Malik ki Beti thi, Ek Khalifa ki Poti thi aur Ka'i Khulfa ki Behan thi, Khalifa bante hi Aapne unke Tamaam Jawahiraat aur Zevraat aur Doosri Qeemti Cheeze Baitul maal me jama kar di, Aapne Mehsoos kiya k Fatima unke is qadam se khush nahi thi, Chuna'che Aapne unse Saaf Saaf keh diya- Tumhe Akhtyar hai, Mere Paas raho ya Apne Maayke chali jao_,"*

*"_ Kehne ka matalab tha k mere Saath rehna hai to un Zevraat aur Jawahiraat ka Khayal dil se nikalna hoga, Zevraat aur Jawahiraat chahe'n to fir mere Saath nahi reh sakti, Ye Sun kar Fatima Raazi ho gayi'n aur bol uthi, Mai'n Aapke Saath rahungi _,"*

*★_ Unhone Apne Ghar ke Akhrajaat ke liye bhi utna hi muqarrar kiya jitna Aam Musalmano ko milta tha, Aapne Jo Sulook Fatima ke Saath kiya tha, Wohi Sulook Apni Tamaam Aulaad yani Beto aur Betiyo'n ke saath kiya, Unke bhi Tamaam Zevraat aur Qeemti Cheeze Baitul maal me dakhil Kara di _,"*

*★_ Aapki ek Bachchi ko kahi'n se Ek Moti mil gaya, Usne Aapse kaha- Agar Aap mujhe is Jesa Ek Moti de de'n to Mai'n ye Do moti Apne Kaano me pehan lungi, Aapne Bachchi ke Saamne Do Angare rakh diye aur Farmaya- Agar Tum ye dono Angare kaano me pehan Sakti ho to Mai'n Tumhare liye Moti ka intezam kar deta hu'n_," Bachchi ye Sun kar Khamosh Ho gayi _,*

*★_ Kisi ne Aapko bataya - Aapke Ek Bete ne Anguthi ke liye ek Nag ek Hazaar dirham me kharida hai_," Aapne foran Apne Bete Ko khat likha, uske Alfaaz ye they:- Maine Suna hai Tumne Anguthi ke liye ek Nag ek Hazaar dirham me kharida hai, Us Nag ko foran bech do aur uski Qeemat Allah ke Raaste me de do, Ek Dirham ki Doosri Anguthi khareed lo, Us par ye Alfaaz likhwa lo- Allah us par Raham farmaye Jo Apna martaba pehchane _,"*

*★_ Aapke Ek Gulam Ka Naam Darham tha, Wo Aapke Liye Lakdiya'n laya karta tha, Khalifa banne ke Chand Din baad Aapne usse puchha- Darham Log kya kehte hai'n? Usne kaha- Log kya kahenge, Wo Sab maze me hai'n, Bas Mai'n Aur Aap Takleef me hai'n_" Hazrat Umar ne puchha - Ye Kyu'n? Usne kaha- Khilafat milne se pehle Maine Aapko Khushbuo'n me base Libaas pehante dekha hai, Umda Umda Ghodo par Sawari karte dekha hai, Lazeez Lazeez khane khate dekha hai, Ab Jab Aapko Khilafat mili to Mera Khayal tha, Mujhe Araam milega, Kaam ka bojh mujhse Halka ho jayega, Lekin mujh par to Ab kaam ka bojh aur badh gaya hai aur Aap bhi Takleef me Fa'ns gaye hai'n _,"*

*"_ Hazrat Umar ne uski Baat Suni To farmaya - Achchha Tum Azaad ho, mujhe mere haal par chhod do, Jaha'n jana chahte ho chale jao _,"*

*★_ Aapki Bivi Fatima ke Ek Bhai Muslima they, Ye bade Bahadur Mujahid Commander they, Unhe Hazrat Umar se bahut Muhabbat thi, Hazrat Umar bhi unse usi Tarah bahut Muhabbat karte they, Muslima me ek buri Aadat thi, Wo Tarah Tarah ke Khano ke Shoqeen they aur poori tarah Fizool kharchi karte they, Hazrat Umar Rehmatullah ko unki is Aadat ka pata tha, Aap Dua Kiya karte they: kaash ! Muslima ye Fizool kharchi chhod de'n, Kahi'n Esa na ho k ye Shoq unhe Haraam me uljha de _,"*

*★_ Ek Din Hazrat Umar ne unhe Hukm diya: Aap Subeh Subeh mere pass Pahu'nch Jaye'n, Unhe ye paigaam bhej kar Aapne khana Tayyar karne ka hukm diya, Aapke Liye Masoor Ki Daal pakayi gayi, Muslima ke liye Tarah Tarah ke Khane Tayyar kiye gaye, Muslima aaya to Aapne Use Apne Paas bitha liya aur usse Baate karne lage Yaha'n tak k Kaafi Waqt guzar gaya aur maare Bhook ke Muslima ka Bura Haal ho gaya, Jab Wo Bhook se buri Tarah bechain ho gaye to Aapne Khaadim ko Apna Khana lane ka hukm diya, Aapke Liye Masoor Ki Daal aa gayi, Aapne Muslima se farmaya- Ye mera Khana hai, Aapka Khana thodi der baad aayega _,"*

*★_ Ye keh kar Aap khane Lage, Muslima se Bhook bardasht nahi ho rahi thi, Wo bhi Tabana Andaz me Aapke Saath khane me Shareek ho gaye aur Daal Roti khoob pet bhar kar kha gaye, Kuchh der baad Unke Saamne Tarah Tarah ke khane Sajaye gaye, Hazrat Umar ne unse farmaya- ye hai Aapka Khana jo khaas tor par Aapke Liye Tayyar karaya gaya hai _,"*

*★_ Muslima ne pareshan ho kar kaha- Mai'n To pet bhar kar kha chuka hu'n, Ab to bilkul gunja'ish nahi, Aapne farmaya- Nahi Bhai Khao, Muslima ne kaha- Ameerul Momineen ! Bilkul koi jagah nahi hai, Ab Aapne usse farmaya- Agar Masoor ki Daal se khoob Ser Ho kar khana khaya ja sakta hai to Fir khane ke Silsile me is qadar Fizool kharchi ki kya zarurat hai, Kyu'n Aag me ghuste ho... Ye Daal hi kaafi hai _," Us Din ke baad Muslima ne Tarah Tarah ke Khano se Tauba kar li _,*

*★_ Hazrat Umar bin Abdul Azeez Rehmatullah maazi me khoob khushbu lagaya karte they, Is Tarah Khushbu daar Tel bhi bahut zyada lagate they, Khalifa banne par Aapne Sab Cheeze chhod di, Kisi jagah Khushbu Mehsoos hoti to Waha'n se Naak Band kar ke guzar jate, Aapne Apne khane pine me bhi is had tak kami kar di thi k khoon jal kar Aapka Rang Siyah ho gaya tha, Khaal Haddiyo'n se Chimat gayi thi aur Jism par gosht baraye Naam reh gaya tha,*

*★_ Aapne farmaya karte they- Jo khane pine me Apne Nafs ki baag dor Sambhal kar nahi rakhta, Wo gairo'n ki Rehnumayi bhi nahi kar sakta aur Jis par uska pet Haakim ho, Wo Haakim hone ki haisiyat se kisi ko mutma'in nahi kar sakta, bhara pet use Ruswa kar ke rehta hai _,"*

*★_ Hazrat Umar Rehmatullah ne Apne Baatin ki bhi Safayi ki Taraf khaas Tavajjo di, Lekin is par bhi Aapko yahi Khayal rehta tha k Aapne kuchh nahi kiya, Roti Kapda aur Ghar Jaa'iz cheeze hai'n, Lekin in Jaa'iz Cheezo se bhi khud ko bachana Sahaba Kiraam ke Rag v Reshe me Sarayat kar gaya tha, Hazrat Umar bin Abdul Azeez Rehmatullah ki bhi yahi Haalat ho gayi thi, Aapne khud Ko Jaa'iz Cheezo se bhi door kar liya tha,*

*★_ Koi Aapse puchhta - Aapne Kaise Subeh ki ? Aap jawab dete- Maine ita'at me der ki, Gunaho'n me Fa'ns kar khaali pet ki haalat me Subeh ki aur Allah se Achchhi ummeed Mai'n Rakhta hu'n _, ( ibne Jozi)*

*★_ Bachpan me Aap Fakhr ke Andaz me chalte they, Jab Aapko Madina Munawwara ka Haakim muqarrar kiya gaya to us Waqt Akad kar chalne lage, Jab Aap Khalifa Bane to Aapne isko chhodne ka irada kar liya Lekin Chu'nki Aadat Pukhta ho chuki thi isliye chhoot na saki, Ye Baat Mehsoos kar ke Aapne Apne Khaadim Mazaham ko hidayat ki - Mazaham! Jab bhi meri chaal me Akad dekho to foran mujhe Khabardaar kar do _," Mazaham is taak me rehne Lage, Jo'nhi mehsoos karte k Aapki Chaal me Akad aa rahi hai Aapko Khabardaar kar dete, Fir hua ye k is koshish me Aapki Chaal hi Ajeeb ho gayi,*

*★_ Khilafat milne ke baad Aap Har Waqt Khof zada rehne Lage, Aapne Ha'nsi Mazaaq bilkul Tark kar diya tha, Peer aur Jumeraat ka Roza rakhte they, Muharramul Haraam ke Pehle Ashre ke Roze bhi rakhte they, Qur'an E Kareem ki Tilawat Ba Qaydgi se karte they, Ek Roz Apni Bivi Fatima se kehne lage: Aaj ki Nisbat hum maazi me Zyada Araam se they na, Fatima boli'n- Haa'n! Ameerul Momineen! Aap us Zamane me zyada Aish me they _,"*

*"_ Aapne unki Taraf se peeth fairte hue farmaya - Fatima ! Mujhe Ek bade Azaab ka dar hai, Agar Mai'n Apne Rab ki Nafarmaani karu'n to uske Azaab se kaise Bach Sakta hu'n _," (ibne Abdul Hakeem)*

*★_ Aapne Urwah bin Muhammad ko Yaman ka Haakim muqarrar farmaya, Unhone Waha'n ke Halaat likhe aur bataya k Yaha'n ke Logo'n par Jizya ki Tarah Khiraaj ki bhi Ek Raqam muqarrar ki gayi, Ye Raqam in Logo'n ko har haal me Ada karni padti hai, Chahe ye Jiye'n ya mare'n, Aapne unhe khat likha, Usme farmaya- jab Tumhe Mera ye khat mile to jis Cheez me tumhe Na insaafi aur Zulm Nazar aaye, Use Chhod do, Haq aur insaaf ko Akhtyar karo, Naye Sire se Khiraaj ki Raqam muqarrar karo Chahe iski miqdaar kitni hi kam kyu na ho, iske liye chahe hume Apni Jaano ki qurbani hi kyu'n na deni pade ( Matlab ye tha k kam se kam Khiraaj muqarrar karo, Logo'n ko Asaani do ) Agar Tum mujhe Yaman se Ek Mutthi bhar Khiraaj bhi bhejoge to bhi Mai'n Tumse Naraaz nahi hu'nga, Bas Tum Haq aur insaaf se kaam lo,... Wassalaam,*

*★_ Aapne Yahya bin Sa'eed ko Africa ke Sadqaat Wasool karne ke liye bheja, Aapne Hidayat farmayi k Sadqaat Wasool kar ke Waha'n ke Gareebo me Taqseem karaye'n, Yahya bin Sa'eed ne Sadqaat Wasool kar ke Gareebo ki Talash shuru kar di, Unhone Koshish ke Bavjood Ek bhi Esa Shakhs na mila Jo Sadqaat le leta, Hazrat Umar Rehmatullah ki islahaat ne Sab Logo'n ko Maaldaar bana diya tha, Aakhir majboor ho kar Yahya bin Sa'eed ne us Raqam se Gulaam Khareed kar Azaad kiye,*

*★_ Khalifa banne ke baad Aapne Tamaam Musalmano ke Naam ye Paigaam bheja: Mai'n Tumhe Allah ka khof Akhtyar karne, uski Kitaab ko Laazim pakadne aur uske Nabi ﷺ ki Sunnat ki Pervi karne ki Vasiyat karta hu'n, Allah Ta'ala ne Wo Tamaam Umoor bayan farma diye hai'n Jo Tumhe karne hai'n aur Jo Nahi karne_,"*

*"_ iske baad Aapne un Tamaam Ahkamaat ki Tafseel Apne is Paigaam me bayan farmayi _,*

*★_ Aapne Governoro aur Lashkaro ke Ameero ko ye hukm jaari farmaya- Deen ka Mazboot Halqa aur islam ka Daromadar Allah Ta'ala par imaan Lana , Theek Waqt par Namaz padhna, Zakaat Ada karna hai, Namazo ki Pabandi karo, Namazo ko unke Waqt par hi padho aur khoob Jaan lo k jo Shakhs Namaz ko Zaaya karta hai Wo Shari'at Ke Baqi Ahkaam ko zyada Zaaya karne Wala hoga,*

*★_ Hazrat Umar bin Abdul Azeez Rehmatullah ne Shahe Rom ke paas Ek Qaasid bheja, Ye Qaasid Ek Din Baadshah ke paas se utha to ghoomte firte Ek Esi Jagah Pahu'ncha Jaha'n Ek Shakhs Ke Qur'an Padhne aur Chakki peesne ki Awaaz aa rahi thi, Ye uske Paas gaya aur use Salam kiya, Magar usne jawab nahi diya, Usne Do Teen martaba Salam kiya, Bil Aakhir usne ye kaha k is Shehar me Salam kesa ? Qaasid ne bataya k Wo Shaahe Rom ke naam Ameerul Momineen ka ek Paigaam Le kar aaya hai aur usse dariyaft kiya k Tumhari Sarguzasht kya hai ? Usne bataya k mujhe Fala'n jagah se Qaid kiya gaya tha, Mujhe Shaahe Rom ke Saamne pesh kiya gaya, Baadshah ne Mujhe Dawat di k Mai'n Nasrani ho Jau'n Varna mujhe Andha kar diya jayega, Magar maine Aa'nkho ke bajaye Deen ko Tarjeeh di, Chuna'che garam Sala'iyo'n se meri Aankhe'n Zaaya kar di gayi'n aur Mujhe Yaha'n Pahu'ncha diya gaya, Rozana itni Gandum peesne ko milti hai aur Ek Roti khane ko,*

*★_ Qaasid Hazrat Umar ke paas gaya to us Shakhs ka Qissa bhi pesh kiya, Qaasid ka bayan hai k Mai'n Abhi poora Qissa Bayan nahi kar paya tha k Hazrat Umar ki Aa'nkho se Aa'nsuo ka Chashma ubal pada Jisse unke Aage Ki Jagah Tar ho gayi, Fir Shaahe Rom ke naam khat likha:- Amma Ba'ad ! Mujhe Fala'n Shakhs ki khabar Pahu'nchi hai ( Yaha'n us Qaidi ke Ahwaal zikr kiye gaye) aur Mai'n Allah ki Qasam khata hu'n k Agar Tune usko Riha kar ke mere pass nahi bheja to Mai'n Tere Muqable me Esa Lashkar bhejunga Jiska Pehla Dasta Tere paas hoga aur Pichhla mere pass _,"*

*★_ Qaasid fir Shaahe Rom ke Yaha'n gaya, Usne kaha - Badi Jaldi dobara aaye ? Qaasid ne Hazrat Umar ka khat pesh kiya, Usne padh kar kaha, Hum Nek Aadmi ko Lashkar Kashi ki Zehmat nahi de'nge Balki Qaidi Waapas kar de'nge _,"*

*★_ Ek Raat Ziyaan bin Abdul Azeez Hazrat Umar bin Abdul Azeez Rehmatullah ke paas aaye, Bahut der tak baate karte rahe, Aakhir Hazrat Umar Rehmatullah ne farmaya - Ye Raat mere Liye bahut Lambi ho gayi Neend Nahi aa rahi aur mera Khayal hai, iska Sabab wo Khana hai jo Maine Raat khaya hai_," Ziyaan ne puchha - Aapne Raat kya khaya tha ? Aapne farmaya - Masoor Ki Daal aur Pyaaz_,"*

*★_ Is par Ziyaan ne kaha- Aapko Allah Ta'ala ne bahut Kushadgi de rakhi hai, Aap khud hi Apne Aapko Tangi me rakhte hai'n _," Uski baat Sun kar Aapne farmaya- Maine Tujhe Apni haalat bata kar Apna bhed khol diya, Tu mera khair khwah nahi, Bad Khwah hai, Allah ki Qasam! Jab tak zinda rahunga, Apna bhed kisi par Zaahir nahi karunga _,"*

*★_ Ek Raat kuchh Log Apne kisi kaam se Aapke paas aaye, Chiraag jal raha tha, Baato ke dauran Chiraag ki lo Kam hui, Aap Chiraag ke paas gaye aur uski lo ki theek kar diya, Haazireen me se kisi ne kaha - Ameerul Momineen ! Aap is kaam ke liye humse keh dete_,"*

*"_ Aapne Jawab me farmaya- koi baat nahi, jab Mai'n utha us Waqt bhi Mai'n Umar bin Abdul Azeez tha, is Waqt bhi Mai'n Umar bin Abdul Azeez hi hu'n _,"*

*★_ Ek Roz Aapke paas Bahut sa Anbar maale Ganimat me laya gaya, Aapne usko Haath me le kar dekha aur hukm farmaya- ise Farokht kar diya jaye _,"*

*"_ Ese me Aapke Haath naak ko ja laga, Aapko khushbu mehsoos hui, Foran Pani mangwaya, Usse Haath dhoye, moo'nh dhoya, Waha'n Mojood Logo'n me se kisi ne puchha - Kya is Ambar me koi khaas baat thi ? Nahi mere haath ko lag gaya tha aur Mai'n uska Haqdaar nahi tha _,"*

*★_ isi Tarah Ek din Kastoori layi gayi, Uski khushbu mehsoos hui to Haath se naak band kar liya aur Farmaya- ise itni door rakho k khushbu na aaye _,"*

*★_ Aapka Gulaam Garam pani Ka Lota le kar aata aur Aap usse Wazu kar liya karte, Ek Din us Gulaam se farmaya - Kya Tum ye Lota Muslamano ke khane pakane ki jagah par le jate ho aur Waha'n Aag ke Paas rakh dete ho ? Gulaam ne arz kiya - Ji Haa'n ! Yahi karta hu'n _,"*

*"_ Ye Sun Kar Aap Naraaz hue aur farmaya - kambakht! Tune Satya naas Kar diya, Ye Lota bhar kar Garam karo aur dekho k is par kitna iydhan lagta hai, Fir Un Tamaam Dino ka hisaab kar ke utna iydhan jama karao _,"*

*★_ Shadeed Sardi ke mosam me Aapko Ek Raat Gusl ki Haajat hui, Khaadim ne Pani garam kar ke pesh kar diya, Aapne puchha- kaise garam kiya ? Usne kaha- Aam matbakh se ( yani Jaha'n Musalmano ka khana pakta hai ) Aapne farmaya- fir ise utha lo _,"*

*★_ Fir Aapne Thande Pani se Gusl ka irada kiya, Ek Shakhs ne Aapse kaha- Ameerul Momineen ! Sardi Bahut hai, Apni Zaat par Raham kare'n, Agar Matbakh ma Pani Apne liye Jaa'iz nahi Samajhte to itne iydhan ki Qeemat Baitul maal me jama Kara de'n, Chuna'che Aapne Esa hi kiya,*

*★_ Aapke Ghar ke Teen Afraad Aapke Bhai Suhail, Aapke Bete Abdul Malik aur Aapke Gulaam Mazaham Aapke madadgaar they, Haq ke Naafiz karne me Aapki madad karte they, Aapko unka Bahut Sahara tha, Ek baar Bani Umayya ke Chand Log jama ho kar Aapke Bete Abdul Malik ke paas aaye aur unse Kaha- Aapke Baap ne humse Qata Rehmi ki hai, Hamare Paas Jo kuchh tha Wo Sab humse Chheen liya hai aur hamare Bado ki Aib Joi ki hai, Allah ki Qasam ! Hum is par Sabr nahi karenge, unse kahiye Ye sab Hamare liye Napasandida hai, isse Baaz aa Jaye'n _,"*

*★_ Abdul Malik ne unka ye Paigaam Hazrat Umar bin Abdul Azeez Rehmatullah tak pahunchane ki haami bhar li, Wo Aapki Khidmat me Haazir hue aur Un Logo'n Ki Baate Aapko batayi, Ye baate sun kar Hazrat Umar Rehmatullah ko bahut Sadma hua, Aapko Sadme ki Haalat me dekh kar Abdul Malik ne kaha- Ameerul Momineen ! Aap Jo karna chahte hai'n Wohi kijiye, Un Logo'n Ki Dhamkiyo ki parwah na kijiye, Allah ki khatir agar hum un Logo'n ka nishana ban jate hai'n to ye hamare Liye khushi ki baat hogi_,"*

*"_ Hazrat Umar Rehmatullah bete ki baat Sun kar bahut Khush hue aur Farmaya- Allah Ta'ala ka behad Shukr hai, Usne Suhail, Abdul Malik aur Mazaham ke Zariye meri kamar mazboot kar di _,"*

*★_ Ek Shakhs ne Aapko Ye keh kar pukara- Ey Zameen me Allah Ke Khalifa _,"*

*"_ Aapne usse farmaya- Dekho Jab Mai'n paida hua tha To Walden ne mere liye ek Naam Tajveez kiya tha, Chuna'che Mera Naam Umar rakha, Agar Tum mujhe Ya Umar keh kar pukarte to Mai'n Jawab deta, Fir Mai'n Bada ho gaya to maine Apne Liye Ek Kunniyat pasand ki, Maine Apni Kunniyat Abu Hafs rakhi, Agar Tum mujhe Abu Hafs keh kar bulate to Mai'n Tumhe jawab deta, Fir Jab Tum Logo'n ne Khilafat mere Supurd kar di to Tumne Mera Naam Ameerul Momineen rakha, Agar Tum Ameerul Momineen ke Laqab se mujhe khitaab karte to Tab bhi koi muzayqa nahi tha, Baqi raha Tumhara ye kehna, Ey Zameen me Allah ke Khalifa, To Mai'n khud ko Esa Nahi Samajhta, Zameen me Allah Ke Khalifa to Hazrat Daowd Alaihissalam aur un Jese Hazraat they Jesa k Allah Ta'ala farmate hai'n - Ey Daowd ! Humne Aapko Zameen me Khalifa banaya _,*

*★_ Muhammad bin Ka'ab Qurzi Hazrat Umar bin Abdul Azeez Rehmatullah se Mulaqaat ke liye gaye, Hazrat Umar Rehmatullah ka Badan us Waqt had darje Kamzor ho chuka tha, Sar Ke Baal jhad gaye they, chehre ka Rang Badal gaya tha, Muhammad Ka'ab Qurzi ne unhe us Waqt bhi dekha tha jab Aap Madina Munawwara ke Governor they, Us Waqt Aap bahut Khoobsurat they, Aapka Badan Sudol tha, Wo Aapko Taktaki baa'ndh kar dekhne lage, Unhe is Tarah dekh kar Hazrat Umar bin Abdul Azeez Rehmatullah ne puchha - ibne Ka'ab ! Kya baat hai ? Khair to hai, Tum mujhe is Tarah kyu dekh rahe ho, goya pehle Kabhi dekha hi nahi _,"*

*★_ Muhammad bin Ka'ab ne jawab diya - Ta'ajjub ki Nazro'n se dekh raha hu'n, Hazrat Umar ne puchha- Aur Tumhe kis baat par Ta'ajjub hai? Muhammad bin Ka'ab ne kaha- Ta'ajjub is baat par hai k Aapka Jism Laagar ho chuka hai, Sar ke Baal jhad gaye hai'n, Chehre ka Rang Kuchh ka Kuchh ho gaya hai _,"*

*★_ Jawab me Aapne farmaya- ibne Ka'ab ! Agar tum mere Dafan ke Teen Din baad meri Qabr me mujhe dekho to Tumhe kis qadar Ta'ajjub hoga, Meri Aa'nkhe Rukhsaro par aa giri hongi, Moo'nh aur Nathno se keede nikal rahe ho'nge, Peep beh rahi hogi, Yaqinan Aaj ki Nisbat us Din Mai'n Nahi pehchana jaunga _,"*

*★_ Aap Apni Betiyo'n Ke Paas isha ki Namaz se Faarig ho kar jate they, Ek Raat gaye to Betiyo'n ne Aapko dekhte hi moo'nh par haath rakh liye aur Andar ki Taraf lapki'n, Aapne Khadima se puchha- inhe'n kya hua ? Khadima ne bataya- Aaj Shaam unke paas khane ke Liye kuchh nahi tha, Majburan Unhone Masoor Ki Daal aur Pyaaz se pet bhara hai, Ye Soch kar Andar chali gayi'n k Aapko Pyaaz ki Bu Mehsoos na ho _,"*

*★_ Ye Sun Kar Hazrat Umar Rehmatullah Ro pade, Fir Apni Sahabzadiyo'n se farmaya - Beti ! Tum Ranga Rang ke khane kha Sakti ho, Lekin fir hoga ye k Tumhare Baap Ko Pakad Kar Dozakh me le jaya jayega _," Ye Sun kar Sahabzadiyo'n Ki Cheekhe'n nikal gayi'n,*

*★_ Jab Fitno ki Aa'ndhiya'n chal rahi thi Us Waqt Aapke Farzand Abdul Malik ne Aapko Ajeeb Sahara diya, Wo Tareekh ka ek Anokha Nojawan Saabit hua, Nojawan they, 20 Saal ke bhi nahi hue they Lekin Aapka imaan Bachpan hi se bahut Mazboot tha, Har maamle me Aapki madad karte rahe, Aapke Haath Mazboot karte rahe, Garz Abdul Malik ne Qadam Qadam par Aapko ubhara aur Aapme koi Narmi na aane di,*

*★_ Ek Roz Aap kaam karte karte bahut zyada thak gaye aur chaha k kuchh der Araam kar le'n, Chuna'che Aap let gaye, Abdul Malik ne foran kaha- Ameerul Momineen Aap kya karna chahte hai'n ? Aapne farmaya- Pyare Bete ! Ab Mai'n Zara Sona chahta hu'n, Abdul Malik ne foran kaha- kya Aap kaam Mukammal kiye bager Soyenge? Is par Aapne farmaya- Pyare Bete ! Kal Raat Mai'n Tumhare Chacha Jaan ke kaam ke Silsile me Raat bhar Jaagta raha hu'n, Ab Thodi der Sone ke baad baqi kaam Anjaam dunga_,"*

*★_ is par Abdul Malik ne kaha- Ameerul Momineen ! Kya Aapko pata hai, Aap So kar uthenge bhi ya nahi, Mustaqbil me Ek Second ke liye bhi Zindgi ka bharosa nahi, Ye Sunte hi Aapne Bete se kaha- Meri Aa'nkho ki Thandak ! Zara mere Qareeb to Aao, Abdul Malik Baap ke Qareeb ho gaye, Aapne unhe gale se laga liya aur unki Peshani choom li, fir Allah Ta'ala ka Shukr Ada Kiya k usne Esa Saleh Beta ata farmaya Jo Deen par itni madad karta hai, iske baad Aap Soye bager hi bahar aa gaye aur Kaam me lag gaye, Elaan bhi karaya k Jis par Zulm hua hai, Wo aa kar bataye, Ameerul Momineen jaag rahe hai'n,*

*★_ Ek Din Aapke Farzand ne dekha k Unke Waalid Koi faisla karne ke Silsile me pareshan hai'n, Unhone kaha- Abba Jaan! Aapko insaaf karne se konsi cheez rok rahi hai, Allah ki Qasam Agar Mujhe aur Aapko ubalti dego me daal diya jaye to bhi mujhe iski parwah nahi, Hum Haq ki Khaatir har Tarah ki Qurbani ke liye Tayyar hai'n,*

*★_ Bete ki baat Sun kar Hazrat Umar ne farmaya - Pyare Bete ! Mai'n Sarkash Ou'nt Jesi is Duniya ko Qabu me kar raha hu'n, Mai'n insaaf ke Tamaam Tareeqe Zinda karna chahta hu'n, Lekin ye kaam Aahista Aahista kar raha hu'n, Taaki Mai'n bhi Duniya ke Laalach se nikal jau'n aur mujhe dekh kar Logo'n ko bhi Duniya se Nafrat ho jaye _,"*

*★_ Ek Din Abdul Malik Hazrat Umar ke paas aaye, us Waqt Aapke paas unke Chacha Muslima bhi Mojood they, Abdul Malik ne kaha- Aap Zara Tanhayi me meri baat sun le'n, Hazrat Umar ne puchha - kya koi Raaz ki baat hai, Jise Apne Chacha se chhupana chahte ho ? Abdul Malik ne foran kaha- Haa'n ! Esi hi baat hai _,"*

*★_ is par Muslima uth khade hue, Ab Abdul Malik Apne Waalid ke paas Beth gaye aur bole- Ameerul Momineen ! Kal Aap Apne Rab ko kya jawab denge Jab Wo Aapse puchhega, Ey Umar Tune Bid'at dekhi thi Lekin use Mitane ki koshish nahi ki thi, Ey Umar Tune Sunnato ko murda hote dekha tha, Kya unko Zinda karne ki koshish ki thi?*

*★_ Ye Sun kar Hazrat Umar ne farmaya - Lakhte Jigar ! Kya is Nasihat par Tumhe kisi baat ne Majboor Kiya hai ya Apne Dil se keh rahe ho ? Abdul Malik bole- Nahi Ameerul Momineen ! Ye baat Mai'ne Apne Dil se kahi hai, Mujhe Maloom hai Aapse ye puchha jaayega, Aapke paas iska kya jawab hoga ? Hazrat Umar Rehmatullah ne jawab me farmaya- Noore Nazar ! Allah tumhe Behatreen jaza de, Tum par Raham farmaye, Mujhe Tumse badi ummeed hai, Tum khair Ke kaamo me mere Sar garm mu'awin Saabit ho'nge, Mere Bachche, meri Qaum ne Khilafat me Beshumar mushkilaat paida kar di hai'n, Zulm ki Buniyado ko bahut Mazboot kar diya hai, Jab Mai'n unse unki Jaydaade Waapas lene ke liye jhagdta hu'n to mujhe Esi Foot pad Jane ka Dar rehta hai Jisse Khoon Kharabe ki nobat na aa jaye, Allah ki Qasam ! Mere Nazdeek duniya ka fana ho jana Asaan hai magar Mai'n Ye nahi jaanta k meri Vajah se kisi ka Zara sa bhi khoon nikle, Kya tum isse Raazi nahi k kabhi na kabhi wo Mubarak Din aa jaye Jis Din Mai'n Bid'at ki jade ukhaad fainku'n aur Duniya ko Sunnato ke Noor se jagmaga du'n, Yaha'n Tak k Allah faisla farma de'n aur Allah Behatreen faisla karne wale hai'n _,"*

*★_ Ek Din kisi Baat par Hazrat Umar bin Abdul Azeez ko Shadeed Gussa aa gaya, Jab Aapka Gussa door ho gaya to Abdul Malik ne kaha- Ameerul Momineen! Allah Ta'ala ne Aapko ye Buland Muqaam ata farmaya hai, Aapko Apne Bando'n par Ameer banaya hai, To kya Allah Ta'ala ki in Ni'amato ki yahi Qadr hai k Aapko itna Shadeed Gussa aa jaye Jo is Waqt maine dekha hai ?*

*"_ Hazrat Umar ne sun kar farmaya - Beta ! Tumne kya kaha, Zara fir kehna, Abdul Malik ne Apne Alfaaz dohra diye, Ab Hazrat Umar bole - Abdul Malik ! Kya Tumhe gussa nahi aata ?*

*★_ Jawab me Abdul Malik bole- Ameerul Momineen ! Mera pet kis Din kaam aayega, Agar Mai'n Gusse ko usme na lota du'n Yaha'n Tak k Zara sa gussa bhi Zaahir na hone du'n _," Matlab ye tha k Mai'n To Gussa is Tarah Pi jata hu'n k koi Mehsoos tak nahi kar sakta k mujhe Gussa aaya hai, Aap bhi Esa hi kiya kare'n,*

*★_ Hazrat Umar Rehmatullah ka ye Azeem Farzand Aakhirat ki fikr me dubla hota chala gaya, Yaha'n Tak k Marzul Maut me giraftar ho gaya, Hazrat Umar unki Ayadat ke liye jate aur puchhte- Abdul Malik ! kya haal hai ? Abdul Malik Apne Waalid se Apna haal chhupa lete k unhe Ranj na ho aur kehte - Alhamdulillah ! Mai'n Achchha hu'n _,"*

*★_ Mareez ki Haalat Hazrat Umar se Chhupi nahi thi, isliye Aapne unse Kaha- Beta ! Mujhse Apni Haalat Theek Theek Bayan karo_," is par Abdul Malik ne kaha- Mai'n Apni Maut ko Qareeb Mehsoos karta hu'n, Lihaza Aap Ajar ki garz se Sabr kare'n, Ky'unki Aapke liye Allah ka Sawab mujhse behtar hai _,"*

*"_ Ye Sun kar Hazrat Umar ka Dil doobne laga, Unhe Abdul Malik se bahut zyada Muhabbat thi, Hazrat Umar unke Paas se chale aaye aur Namaz padhne Lage, itne me Muzaham ne aa kar bataya- Ameerul Momineen ! Abdul Malik Wafaat pa gaye, Hazrat Umar behosh ho kar gir pade,*

*★_ Yu'n To Hazrat Umar Rehmatullah ki Aulaad bahut thi, Aapke 12 Bete they, 3 Betiya'n thi'n, Lekin unme Sabse Zyada Aalim aur Faqeeh Abdul Malik hi they, Baap Ko Nasihat karne me bahut Diler they, Jab Unhe Dafan kar diya gaya to Aap Qibla aur Qabr ke Darmiyan khade ho gaye, Baqi Log Aapke Charo Taraf khade they, Us Waqt Aapne kaha-*

*"_ Beta ! Tum par Allah Raham farmaye, Tumhari Paidaish se khushi hui thi, Tumhara uthan Nekiyo'n se bharpoor raha, Mujhe to ye bhi gawara nahi tha k Mai'n Tumhe Awaaz du'n aur Tum meri Awaaz par Labbek kaho, Mujhe Tumhari Zara si Takleef bhi gawara nahi thi, Aaj Tumhe is Jagah rakh kar Mai'n bahut khush hu'n, Tumhare bare me Allah se jo hissa mujhe Milne wala hai, Uski bahut zyada ummeed hai, Allah Tumhare Gunaho'n se Dar Guzar farmaye aur Tumhare Nek A'amalo ko Behatreen badla ata farmaye aur Tumhari Buraiya'n Mita de aur Tumhare Liye Dua karne wale Har Shakhs par Allah Apna Raham farmaye khwah wo Azaad ho ya Gulam, Haazir ho ya Gayab aur Mard ho ya Aurat, Jisne Khuloos se Tumhare liye dua ki Allah use Ajr ata farmaye, Hum Allah ke Faisle par Raazi hai'n aur Uske Hukm ke aage jhuke hue hai'n aur Allah Rabbul Aalameen ka bahut bahut Shukr hai _,"*

*★_ Fir Hazrat Umar Abdul Malik ki Qabr se Waapas Lote, Sab Logo'n ko unki maut ka bahut Sadma tha, Sab Log rehti Duniya tak un par Afsos karte rahenge, Unke liye Rahmat ki Dua karte rahenge,*

*★_ Hazrat Umar ki Majlis me Bethne Walo me Abdullah bin Utba bahut hi Mukhlis they, Aap unke bare me kaha karte they- Agar mujhe Abdullah ki Ek Majlis Naseeb ho jaye to wo mujhe Duniya v Mafiha se pyari hai, Allah ki Qasam Mai'n Abdullah ki Ek Raat unhe Sarkari Khazane se Ek Hazaar Dinaar de kar khareed lunga _,*

*★_ Logo'n ne is baat par aitraaz karte hue kaha- Ameerul Momineen ! Ye Aap kya keh rahe hai'n, Jabki Aap Sarkari Khazane ke maamle me bahut zyada Ahatyaat karte hai'n aur uski Zarurat se Zyada Hifazat karte hai'n _,"*

*"_ Aapne Jawab me farmaya- Tum Logo'n ki Aqale'n Kaha'n chali gayi'n, Allah ki Qasam Mai'n Unki Raay,Khair Khwahi aur Hidayat se Sarkari Khazane me Karodo Rupiya Jama kar dunga_,"*

*"_ Ye Abdullah bin Utba bhi Hazrat Umar ki Zindgi hi me Faut ho gaye,*

*★_ Aapke Daur me Ye Haalat ho gayi thi k Koi Shakhs maal le kar aata aur Zarurat Mamdo me Taqseem karne ke liye unko Talash Karta to use Zarurat mand milte hi nahi they, Use Apna maal Waapas le jana padta,*

*★_ Aapki Tadap ye thi k islam Zameen ke Kone Kone Tak fail jaye aur Log Seedhe Raaste Par chalne lag Jaye'n, Aap Aalimo Ko Takeedi khutoot likhte, Wo Zimmiyo Ko islam ki Dawat dete, Aam Tor par Zimmi Musalman ho jate they, uske baad unse Jizya na liya jata, is Tarah Khazane me maal jama na hota, Baitul maal ke Nigraa'n khazana Khali hone ki Shikayat karte to Aap farmate - Logo'n ka Raahe Hidayat pa jana Khazana bharne se kahi'n Zyada behtar hai _,*

*★_ Jo'n Jo'n Aapki Umr badh rahi thi, Maut ka khof Zyada ho raha tha, Shayad iski Vajah ye thi k Khalifa Abdul Malik, Waleed aur Suleman Aapke Saamne faut hue they, Aapne Waleed ko Apne Haatho'n se Qabr me utara tha, Unke Naazo Ni'amat me pale Jismo ko Qabr me Dafan hote dekha tha, Isliye Aap Tanhayi me Ghut Ghut kar roya karte they, Aapki Aaho'n ki Awaaz Sunayi deti thi, Aap farmaya karte they- Kya in Teeno Khulfa ke baad Ab meri baari hai _,"*

*★_ Aapke Bhai Shuhel Aapke Saamne faut hue they, Aapke Gulaam Mazaham Aapke Saamne faut hue, Aapke Farzand Abdul Malik Aapke Saamne faut hue, In Tamaam mauto ne Aapme Maut ki Yaad bhar di thi, Maut ke bare me Aapke imaan me izafa kar diya tha, Aapko Maut se Ek Qism ka uns paida ho gaya tha aur Aap har Waqt maut ka intezar karne lage they, Maut Ke Baad Hisaab Kitaab ka Khof Aap par Sawaar rehne laga tha, is Tarah maut unke Andar Kooch ka Nakkara bajati rehti thi,*

*★_ Aapke Zamame me Aapki Taraf maut se darne Wale Hazrat Hasan Basri Rehmatullah bhi they, Yazeed bin Hoshab farmate hai'n- Maine Umar bin Abdul Azeez Rehmatullah aur Hasan Basri Rehmatullah se zyada maut se darne Wala kisi ko nahi dekha, Yu'n Lagta tha goya Aag unhi dono ke liye paida ki gayi hai _," Aapne Duniya ki Muhabbat dil se nikaal fainki thi, isliye Aapka Nafs Aapka Farmabardar ban gaya tha,*

*★_ Ek Roz Aap Memoon bin Mehran Ke Saath Qabristan gaye aur Qabro'n ko dekh kar Rone lage, Fir Memoon se farmaya- Abu Ayyub ! Ye mere Khandaan ke Buzurgo ki Qabre hai'n, Goya Unhone Duniya me Aish v Araam kiya hi nahi tha, Un par Boshidgi ne Apne Panje gaad diye hai'n, Sote Sote unke Jismo me Keesde Ter gaye hai'n _," Fir Aap der tak Rote rahe, Aakhir unse bole- Aao Chale ! Mere khayal me unse badh kar kisi ko Araam v Raahat Naseeb nahi Jo Qabro me utar kar Allah ke Azaab se mehfooz ho gaye _,*

*★_ Ek Din Raqqashi Aapse Mulaqaat ke liye aaye, Aapne unse farmaya- Raqqashi ! Koi Nasihat karo, Unhone kaha- Ameerul Momineen ! Jannat aur Jahannam ke Darmiyan Koi Ghar Nahi hai _,"*

*★_ Aapki Zoja Fatima se Aapke bare me puchha gaya to Unhone bataya- Allah ki Qasam ! Aap bahut zyada ibaadat karne Wale nahi they Lekin Maut Ko Kasrat se Yaad karte they, Maine unse Zyada Allah se darne Wala kisi ko nahi dekha, Jab Aapko Bistar par Allah Ta'ala Ka khayal aa jata to Khof ke maare Tadapne lagte, Yaha'n Tak k Hume Mehsoos hone lagta k Aap Subeh tak Faut ho jayenge _,"*

*★_ Ek Roz Apne bare me farmaya- Mai'n Bahut Shoqeen Mizaaj tha, Jab kabhi kisi Cheez ko dekh leta to usse behtar ke liye Khwahish karta, Jab Mai'n Madina Munawwara me Bachcho ke Saath Ek Bachcha tha to mujhe Arbi ilm v Adab ka Shoq hua aur Maine Apni Zarurat ke Liye ilm v Adab seekh liya, Fir Mujhe Fatima bint Abdul Malik se Nikaah ka Shoq hua, Allah ne mera unse Nikaah Kara diya, Fir mujhe Amarat ka Shoq hua aur Mai'n Madina Munawwara ka Ameer bana diya gaya, Fir meri Tabiyat ne Khilafat chahi aur maine Khilafat pa li, fir jab Khilafat se oupar Duniya me koi izzat ki cheez na rahi to mujhe Aakhirat me Allah ki Ni'amato ka Shoq ho gaya _, (ibne Jozi-66)*

*★_ Aur Aakhir Aapki islahaat Aapke Mukhalifeen se bardasht na ho saki, Unhone Aapko Zehar de kar Halaak karne ka Faisla kar liya, Ye kaam Abdul Malik ke bete Yazeed ne Aapke Khadim ke Zariye liya, Zehar Ka Asar Mehsoos karne Par Aapne Khaadim ko bulaya aur usse puchha- kya Tumne mujhe Zehar diya hai ? Usne kaha- Haa'n ! Mai'n Anguthe ke pore par Zehar laga kar laya tha aur use Pani me Mila diya tha, Fir maine wo Pani Aapko pila diya,*

*★_ Aapne use chhod diya, Aapse kaha gaya k Aap Zehar ka ilaaj karaye'n, is par Aapne farmaya-Agar mujhe maloom hota k Sirf kaan ko chhu lene se Zehar ka Asar door ho jayega To bhi Mai'n Kaan ko na Chhoota, Mera Rab kya hI achchha hai Jiske paas Mai'n Ja Raha hu'n _,*

*★_ Aapne Abdullah bin Zakaria ko bulwaya, Ye Shaam Ke Waliyo me se they, Aapne unse farmaya- Jaante ho maine Aapko kyu bulwaya hai ? Unhone kaha- ji nahi, Aapne farmaya- Maine Aapko Ek kaam ke liye bulwaya hai, Lekin bataunga baad me, Pehle Aap Qasam khaye'n k inkaar nahi karenge _,"*

*★_ Unhone Qasam khayi, Ab Aapne unse Kaha- Allah se Dua kare'n, Allah mujhe Apne Paas bula le _,"*

*"_ Ye Sun kar Abdullah ghabraye aur bole- Jab to Mai'n Musalmano ke liye Aapke Paas Badtareen aane wala hu'n aur Ummate Muhammadiya ka Dushman hu'n, is Par Hazrat Umar bole- Aapne Qasam khayi hai _,"*

*★_ Aakhir Abdullah bin Zakaria ko Dua maangna padi lekin Dua maangte hue Hichkichaye aur Rote hue Dua Maa'ngi - Ey Allah Aapke baad mujhe bhi Zinda na rakh,*

*"_ is Tarah Aapki Wafaat ke baad Abdullah bhi faut ho gaye,*

*★_ Hazrat Umar Rehmatullah ko jab Apni maut ka Yaqeen ho gaya to Aapne Baalo ka Ek kurta pehan liya, Wo Ghutno tak pahunchta tha, Uski Aasteen kohniyo'n tak thi, Wo is qadar Garm tha k Aapke Jism se Paseena behne laga, Logo'n ne kaha- Aap kyu Takleef utha rahe hai'n, ise utaar de'n, Aapne use na utara, Paseena behta raha, us Kurte me jazb hota raha lekin Aapne us Kurte ko na utara _,*

*★_ Fir Aapki Bimari zor pakad gayi, Aap us Waqt Dere Sam'an me they, Dere Sam'an ke Jis Hisse me Aap thehre hue they uska Baqrah tha, Waha'n ke Girje ka Ek Paadri Aapke Liye Girja ke Darakhto ke naye phal laya, Aapne Wo Phal khushi se qubool kar liye aur unki Qeemat Paadri ko dene ka Hukm farmaya, Paadri ne Qeemat lene se inkaar kar diya, Aap barabar use Samjhate rahe, Aakhir usne Qeemat le li,*

*★_ Fir Aapne us Paadri se kaha- Mai'n is Bimari se bachunga nahi, Ye Sun kar Paadri Rone Laga, Aapne usse farmaya- Tum us Girje ki Zameen ke Maalik ho, Tum Ek Saal ke liye Qabr ke liye jagah bech do, Jab Ek Saal guzar jaye to Tum Hal chala sakte ho aur usse fayda utha Sakte ho, Garz Ek Qabr ki jagah ka Sauda ho gaya,*

*★_ Jab Logo'n Ko Aapki Shadeed Bimari ka pata chala to Aapki ibaadat ke liye aane lage, ibaadat karne Walo me Aapke Saale Muslima bin Abdul Malik bhi aaye, Wo bade Mujahid Sipah Salaar they, Us Waqt Aap behosh they, Dekhne Walo ka Andaza bhi tha k bachenge nahi, Us Waqt Aap Khajooro ke Patto se bane gadde par lete hue they, Aapke niche chamde ka Takiya tha aur Aapke Ouper Ek chaadar thi, Ho'nt khushk they, Rang badla hua tha,*

*★_ Ese me Aapko Hosh aa gaya, Aapki Nazar Muslima par padi to farmaya- Meri maut ke Waqt Mojood rehna aur Tum hi mujhe Gusl dena aur Mere Janaze ke Saath Qabr tak jana, Apne Haatho se mujhe Qabr me utarna _,"*

*"_ Us Waqt Muslima ne Moqa Ganimat Jaan kar kaha- Ameerul Momineen! Aap Duniya se Rukhsat ho rahe hai'n Lekin Aapne Apni Aulaad ke liye kuchh bhi nahi chhoda, Unke Paas kuchh bhi nahi hai, Aap unke Liye hukm farma de'n, Taaki unhe Baitul maal se Wo maal Ada kar diya jaye _,"*

*★_ Ye Sun Kar Aap Khamosh rahe, Muslima ne fir kaha- kya Aap Wasiyat nahi farmayenge ? Aapne farmaya- Kis Cheez ki Wasiyat karu'n, Allah Ki Qasam ! Mere paas maal nahi hai_,"*

*"_ is par Muslima ne kaha- Ye Lijiye ! Ek Laakh Dinaar, Aap inko jis tarah chahe kharch kar Sakte hai'n _,"*

*★_ Ab Hazrat Umar Rehmatullah ne farmaya- Muslima ! Meri Baat manoge, Muslima bole- Ji Haa'n ! Farmaye'n, Aapne Farmaya-Ye unhe Waapas kar do, Jinse ye liye gaye hai'n, Ye kehte hi Aap Behosh ho gaye, Muslima ro kar kehne lage: Ameerul Momineen ! Waqa'i Aapne Hum Sangdilo ko Narm bana diya,*

*★_ Hazrat Umar ne Apni Aulaad ko maal ka Waaris na banaya, Aapka Khayal tha k Nek Aulaad ko Wirasat me Milne Wale maal ki Zarurat nahi hoti, Balki Wirasat to Nek Aulaad ko bigaad deti hai,*

*★_ Aapko Hosh aaya to farmaya- Mujhe Tek laga kar bitha do, Jab Aapko bitha diya gaya to Aapne farmaya- Kya Tum mujhe Faqeeri se darate ho, Tum kehte ho k Apne Bachcho ko Mehroom kar diya hai, Maine unhe Unke Waajibi Haq se Mehroom nahi rakha, Raha Tumhara ye Mutalba k Mai'n unhe Baitul maal se Dene ki Wasiyat kar jau'n to dekho, Mera Kaar Saaz Allah hai, Usne Aasman se Kitaab utari, Wohi Nek Logo'n ka Dost hai, Dekho ! Meri Aulaad do Haal se khaali nahi Ya to wo Parhezgaar hai, is Soorat me Allah gaib se use rizq ata farmayega Ya Wo Gunehgaar hai to meri Jurrat nahi k Gunaah par uski madad karu'n _,"*

*★_ Aapke Yaha'n 14 Bachche paida hue they, Unme se 11 Baqi reh gaye they aur Wo Sabke Sab is Waqt Aapke paas Mojood they, Aapne un Sabko Nazdeek bulaya, Unhe dekha, Fir farmane lage - in Nojawano par meri Jaan Qurban ho, Mai'n inhe bila maal ke chhod chhode ja raha hu'n, Mere Bachcho ! Tumhara Baap Do Haal se khaali nahi Ya to Tum Maaldaar ban jao aur Tumhara Baap Jahannam me jaye Ya Mohtaaj ban jao aur Tumhara Baap Jannat me jaye, Tumhara Faqeer hona aur Tumhare Baap ka Jannat me Jana bahut Achchhi baat hai, Jao Tumhe Allah Ta'ala Rozi Pahu'nchayega_,"*

*★_ Raza bin Haiwah Aapke Paas aaye aur bole- Ameerul Momineen ! Yazeed bin Abdul Malik ko Wasiyat likh dijiye aur unhe Allah ka Khof yaad dilaiye _,* *"_Aapne Yazeed bin Abdul Malik ke Liye ye Wasiyat likhi- Yazeed! Jo log Tumhe Pasand na kare'n, Unka bhi Khayal rakhna _,*

*★_ Jis Waqt Hazrat Umar Rehmatullah ye Wasiyat likhwa rahe they, Tamaam Waadi se Rone aur Siskiya'n lene ki Awaaze aa rahi thi, Fir Aap par Behoshi Taari ho gayi, Haalat aur bigad gayi aur Aapke paas Sirf Aapki Joza Fatima, unke Bhai Muslima aur Aapke Khaadim Murshid hi reh gaye, Hosh me aaye To fir Aap Raat bhar bedaar rahe, Fatima, Muslima aur Murshid bhi saath jaagte rahe, Fir Subeh ho gayi to Fatima ne Murshid se kaha - Murshid Tum Ameerul Momineen ke paas rehna_,*

*★_ Ye keh kar wo Apne Bhai Muslima ke Saath chali gayi'n, Ye Log Raat bhar ke Jaage hue they, Neend ne aa liya, Din chadhe inki Aa'nkh khuli, Ameerul Momineen ke Kamre ki Taraf aaye to Murshid ko Darwaze par Soya hua paya, Unhone use Jagaya, Fatima ne usse Kaha- Murshid Tum bahar kyu aa gaye ? Murshid bola- Ameerul Momineen ne hi bahar bhej diya tha, Aapne farmaya tha k Murshid mere paas se hat ja, Allah ki Qasam mujhe Ek Makhlooq Nazar aa rahi hai, Uski Tadaad badhti ja rahi hai, Wo insaan hai'n na Jinn,*

*★_ Ye Sun kar Mai'n bahar nikal aaya, Nikalte waqt maine Suna, Aap farma rahe they, Ye Aakhirat ka ghar hai, Hum use unhe denge Jo Duniya me bulandi aur Fasaad Nahi chahte aur Achchha Anjaam Paarsaao'n ka hai_,*

*"_ Ye Sun kar Hazrat Fatima Andar ki Taraf daud padi, Aapne dekha, Hazrat Umar Rehmatullah ki Aa'nkhe band thi aur Aap Duniya se Rukhsat ho chuke they, inna lillahi wa inna ilaihi Raaji'un _,*

*★_ Aapne Juma Ke Roz 40 Saal Ki Umr me 24 ya 25 Rajjab 101 Hijri me Wafaat payi, Aap Apni Umr me bare me Aksar Farmaya Karte they - Allah ki Muhabbat 40 Saala Shakhs ke Liye Mukammal ho Jati hai, Uske baad Gunaah Karne ke Liye insaan ke Paas Koi Qabile Qubool Uzr nahi reh Jata _,*

*★_ Aapki Namaze Janaza Aapke baad banne Wale Khalifa Yazeed bin Abdul Malik ne padhayi, Aapne Do Saal aur Chand Maah Khilafat ki, is Mukhtasar si muddat ko bhi log bahut badi muddat Shumar karte hai'n, Kyunki is Mubarak Zamane me khair v Barkat is Qadar rahi k Hazrat Umar Raziyallahu Anhu ke Daur Ki Yaade'n Taza ho gayi'n, Logo'n ko insaaf mila, unse chheene gaye maal unhe Waapas mile, Har Taraf Barkaat hi Barkaat Nazar aane lagi,*

*★_ Aapko Girje me us Jagah Dafan kiya gaya jo jagah Aapne khareedi thi, Muslima bin Abdul Malik ne Aapki Qabr par khade ho kar farmaya- Allah ki Qasam! Aapki Tabiyat me Narmi rahi hattaki Aapne Qabr dekh li_,"*

*"_ Fir Aapko Dafan hue Ek Saal guzar gaya, Us Paadri ko ye Haq Haasil ho gaya k Aapki Qabr barabar kar de, us Zameen se fayda uthaye, Lekin usne Aapki Qabr ko nahi ukhada, Us Zameen se fayda nahi uthaya Balki use Yu'nhi rehne diya, Uski Hifazat karta raha Taaki log Aapki Qabr par aa kar Aapki Magfirat ki Dua karte rahe'n,*

*★_ Hazrat Umar Rehmatullah ki Qabr Girja ki Zameen me Ek Taveel Muddat tak baqi rahi, Yaha'n Tak k jab Banu Umayya ka Daur khatm hua aur Abbasi Daur Shuru hua To Abbasi Khulfa ne Banu Umayya ki Qabro Ko ukhada, Unme se Laasho ko nikaal kar unki behurmati ki Lekin Hazrat Umar bin Abdul Azeez Rehmatullah ki Qabr ko kisi ne Haath Tak na lagaya, Aapki Qabr ko Jo'n Ki To'n barqarar rahi, Log uska usi Tarah Ahatram karte rahe, Paas se guzarne wale Qabr ki Ziyarat karte rahe, Aapke Liye Dua karte rahe,*

*★_ Fir Mashriq par Tabahi aayi, Us Tabahi me ye Girja bhi mit gaya, Qabr ka nishaan bhi mit gaya, Nishaan Zaroor mit gaya Magar Aapki Haddiya'n Wahi'n mehfooz rahi'n, Unhe kisi ne na ukhada aur jis Tarah Aapki Haddiya'n mehfooz rahi'n usi Tarah Aaj Tak Aapka Naam Zinda hai aur Zinda rahega,*

*★_ Khulfa banne Ke baad se Wafaat tak na Aapne koi Nayi Sawari khareedi, na kisi Aurat se Nikaah kiya, Na Baa'ndi rakhi, Khilafat se Wafaat tak Aapko Khul kar hanste nahi dekha gaya, Allah ki Aap par Karodo Rehmate Naazil ho'n, Aameen _,*

*"____ Alhamdulillah Mukammal hua _,*

*📗 Umar E Saani Qadam Ba Qadam ( Musannif - Abdullah Faraani )*

 https://whatsapp.com/channel/0029VaoQUpv7T8bXDLdKlj30

*👆🏻Follow for Join WhatsApp Channel*

╨─────────────────────❥

💕 *ʀєαd,ғσʟʟσɯ αɳd ғσʀɯαʀd*💕                          *❥✍ Haqq Ka Daayi ❥*    

http://haqqkadaayi.blogspot.com

*👆🏻Visit for All updates,*

https://chat.whatsapp.com/HWzZMSYtDIk8fIkxDU7zHB

*"👆🏻_Sirf Roman Post Ke liye Link se Join Kijiye,*

https://t.me/haqqKaDaayi

*👆🏻Telegram Per Join Link_,*

┣━━━━━━━━━━━━━━━━━━━━┫

⚂⚂⚂